Трагедыя здарылася на праваслаўнае Раство.
У Кобрыне дзевяцігадовая дзяўчынка падчас сваркі ўдарыла нажом сваю бабулю, праз тры дні жанчына памерла.
Пра гэта паведаміў сёння падчас прэс-канферэнцыі начальнік УУС Брэсцкага аблвыканкама Фёдар Балейка.
Трагедыя адбылася 7 студзеня каля 21:00. Сям'я святкавала Каляды. Дарослыя пілі.
Канфлікт адбыўся на кухні, дзе знаходзілася бабуля. У нейкі момант туды забегла дзяўчынка 2006 нараджэння.
Паводле папярэдняй версіі, пажылая жанчына ўдарыла дзяўчынку і цягала яе за валасы. Абараняючыся, унучка схапіла нож са стала і двойчы ўдарыла ім 58-гадовую жанчыну ў жывот.
Дачка пацярпелай — маці дзяўчынкі — перавязала параненую, але да медыкаў звяртацца не стала. Праз тры дні, 11 студзеня ў 16.20, пенсіянерка памерла ў кватэры.
Абставіны трагедыі ўдакладняюцца. На месцы здарэння працуе аператыўна-следчая група.
Вядома, што сям'я лічылася нешчаслівай, знаходзіцца ў сацыяльна небяспечным становішчы. На выхаванні там знаходзіцца чацвёра дзяцей.
Бацька ў гэты час быў на заробках у Расіі.
Загінулая пенсіянерка 1959 нараджэння была неаднаразова судзімая за крадзяжы. Маці дзяўчынкі раней злоўжывала спіртнымі напоямі.
«Напэўна, органы апекі і папячыцельства нешта не ўлічылі ў сваёй працы, не дайшлі да таго, каб усё ж такі прыняць меры па забранні гэтых дзяцей. У выніку такая вось трагедыя, па якой нам яшчэ прыйдзецца разбірацца.
І гэты выпадак, на жаль, не адзінкавы. У Столінскім раёне ў мінулым годзе бабуля забіла ўнука-інваліда. У Пружанскім раёне на пажары нядаўна загінулі двое дзяцей — там таксама сям'я не зусім шчаслівая. Мы цесна ўзаемадзейнічаем з адпаведнымі службамі і ведамствамі, але праблемныя пытанні ёсць», — канстатаваў начальнік УУС.
Цяпер чытаюць
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы15
Каментары