«Газпром» выставіў «Нафтагазу» рахунак на 2,5 млрд даляраў
Расійскі «Газпром» прад'явіў «Нафтагазу Украіны» рахунак на 2,5 млрд даляраў за газ, не выбраны украінскім холдынгам у III квартале 2015 года.
Як гаворыцца ў паведамленні «Газпрома», у III квартале 2015 у дамове з украінскай кампаніяй заставалася ў сіле ўмова «бяры або плаці».
«Украіна ў 2015 годзе фактычна адмовілася ад закупак расійскага газу ў трэцім квартале, такім чынам, ніякіх дамоўленасцяў аб непрымяненні правіла «бяры або плаці» ў гэтым перыядзе не было», - гаворыцца ў паведамленні «Газпрома», падпісаным кіраўніком кампаніі Аляксеем Мілерам.
Правіла «бяры або плаці» у кантэксце дамовы паміж «Газпромам» і «Нафтагазам» азначае, што ўкраінская кампанія павінна абавязкова аплачваць абумоўлены ў кантракце аб'ём газу (па-за залежнасці ад таго, ці патрэбны ён ёй), або заплаціць штраф.
Пры гэтым у I, II і IV квартале года правіла не дзейнічала: ва II квартале «Газпром» пагадзіўся спісаць усе штрафы за нявыбраны Украінай газ, а ў IV квартале дзеянне правіла было прыпынена расійскім бокам пасля міжнародных перамоў з удзелам РФ, Украіны і Еўрапейскай камісіі.
Паводле ацэнкі Газпрома, улічваючы розніцу паміж аплачанымі пастаўкамі ў III квартале і колькасцю фактычна пастаўленага ва Украіну газу, штраф, які накладаецца на «Нафтагаз», роўны 2,549 млрд даляраў, гаворыцца ў паведамленні.
«Газпром» чакае аплаты рахунку на працягу 10 дзён», — рэзюмаваў Мілер.
Каментары