Беларусь і ЗША дамовіліся вырашыць праблему адсутнасці паслоў пасля амерыканскіх прэзідэнцкіх выбараў. Пра гэта заявіў Аляксандр Лукашэнка пасля таго, як прагаласаваў на парламенцкіх выбарах на ўчастку № 509 у Белдзяржуніверсітэце фізічнай культуры.
«Пасол абавязкова будзе, мы пра гэта ў прынцыпе дамовіліся. Калі - спытаеце ў амерыканскага боку», - сказаў кіраўнік дзяржавы, адказваючы на пытаньне «Радыё Свабода».
На думку Лукашэнкі, гэта праблема будзе вырашана пасля выбараў прэзідэнта ЗША. Яны, нагадаем, пройдуць 8 лістапада. Кіраўнік дзяржавы пагадзіўся, што гэта ненармальна, што паслоў няма так доўга.
«Але я спадзяюся, мы гэта хутка вырашым і вам не прыйдзецца ездзіць у Вільню або Кіеў па візы. Хоць гэта пытанне да ЗША, яны што не могуць без амбасадара візы выдаваць? Пасол ж візы не выдае», - адзначыў Лукашэнка.
З моманту дыпламатычнага скандалу паміж Мінскам і Вашынгтонам у 2008 годзе і ад'езду амбасадара Карэн Сцюарт ЗША прадстаўлены ў Беларусі на ўзроўні часовага паверанага, а штат пасольства быў скарочаны з 35 да пяці чалавек. Скандал здарыўся пасля ўвядзення Злучанымі Штатамі санкцыяў у дачыненні да дзяржканцэрна «Белнафтахім» у сувязі з парушэннямі правоў чалавека ў Беларусі.
На сёння ў пасольстве ЗША ў Беларусі дазволена працаваць дзевяці дыпламатам. Нядаўна атрымаў акрэдытацыю дарадца па эканамічных пытаннях і вайсковы аташэ.
Каментары