Моцны землятрус адбыўся ў Эгейскім моры непадалёк ад заходняга ўзбярэжжа Турцыі і грэчаскай выспы Лесбас. Страсенне глебы адчулі таксама жыхары Стамбула і Афін, піша ВВС.
Паводле даных Геалагічнай службы ЗША, эпіцэнтр землятрусу магнітудай 6,3 знаходзіўся за 5 кіламетраў на поўдзень ад грэчаскага горада Пламары, размешчанага на паўднёвым ускрайку Лесбаса.
Як паведаміў мэр Пламары, у цэнтры горада былі пашкоджаныя некаторыя будынкі. Даных аб ахвярах і пацярпелых пакуль не паступала.
Грэцыя і Турцыя размяшчаюцца на лініях геалагічных разломаў, і землятрусы ў гэтых месцах нярэдкія.
«Страсенне было і сапраўды моцным. Усё ў маёй клініцы пачало дзіка трэсціся і разгойдвацца, мы з пацыентамі адразу выскачылі на вуліцу, — распавёў агенцтву Рэйтэр Дыдэм Эрыс, 50-гадовы зубны лекар у прыбярэжным турэцкім горадзе Ізміры. — Нам, жыхарам Ізміра, зусім не прывыкаць да землятрусаў, але на гэты раз усё было па-іншаму. Я яшчэ падумаў, што, магчыма, цяпер мы загінем».
Карыстальнікі сацыяльных сетак, якія знаходзяцца ў заходняй Турцыі, паведамляюць аб моцным і працяглым дрыгаценні зямлі пад сабой і наступных туршках, якія адчуваліся па ўсім рэгіёне Эгейскага мора.
«У наступныя гадзіны, дні і тыдні нам давядзецца зведаць шэраг паўторных штуршкоў», — кажа кіраўнік абсерваторыі Кандылі ў Стамбуле Халюк Озенер.
Паводле папярэдніх даных, у двух гарадах на грэчаскай выспе Лесбас былі адзначаныя пашкоджанні ў раёнах старой забудовы. Некалькі мясцовых жыхароў паскардзіліся на невялікія траўмы.
Цяпер чытаюць
Справа Софтклуба: затрыманы патрыярх беларускага ІТ Уладзімір Сіротка і некалькі топ-менеджараў. Яны падарылі нам АРІП19
Каментары