Першае паўгоддзе 2022 года — рэкорднае па збядненні найбагацейшых людзей свету
У першай палове 2022 года сукупныя капіталы 500 найбагацейшых людзей свету скараціліся на 1,4 трлн даляраў — і гэта максімум за ўсю гісторыю, піша агенцтва Bloomberg.
Паводле падлікаў агенцтва, за гэты час стваральнік Facebook Марк Цукерберг страціў $ 65,5 млрд, заснавальнік Amazon Джэф Безас — $ 63 млрд, заснавальнік Tesla і SpaceX Ілан Маск — $ 62 млрд, а гендырэктар Louis Vuitton Moët Hennessy Бернар Арно — $ 49,3 млрд.
Пры гэтым ім усім удалося захаваць свае месцы ў глабальным рэйтынгу мільярдэраў Bloomberg Billionaires Index. Маск застаўся на першым месцы з капіталам $208 млрд, Безас — на другім ($130 млрд), а Арно — на трэцім ($129 млрд).
Найбольшыя страты панёс заснавальнік крыптавалютнай біржы Binance Чанпен Чжаа, які займае 190 месца ў рэйтынгу мільярдэраў: ягоны маёмасны стан з пачатку года скараціўся на $85,6 млрд і цяпер ацэньваецца «ўсяго» ў $ 10,2 млрд.
Расійскія мільярдэры з пачатку года страцілі $36 млрд.
У папярэднія два гады сітуацыя была іншая — капіталы найбагацейшых людзей свету толькі павялічваліся, адзначае Bloomberg. Агенцтва звязвае рост багацця ў гэты час з беспрэцэдэнтнымі стымулюючымі мерамі ўрадаў і цэнтральных банкаў розных краін на фоне пандэміі каранавіруса.
Цяпер чытаюць
Як у галечы співалася радня Лукашэнкі? Малавядомыя факты2
Каментары