Харватыя далучыцца да Шэнгенскай зоны з новага года, а Румынія з Балгарыяй пакуль не
Харватыя з 1 студзеня 2023 года далучыцца да Шэнгенскага пагаднення, а Румынія і Балгарыя працягнуць чакаць сваёй чаргі, нягледзячы на выкананне неабходных тэхнічных патрабаванняў. Супраць іх далучэння да Шэнгену выказваецца Аўстрыя, якая не выключае росту нелегальнай міграцыі праз гэтыя краіны.
Нідэрланды таксама мелі прэтэнзіі, хоць і не да абедзвюх краін. Іх задавальняла сітуацыя ў Румыніі, але непакоіла Балгарыя — найперш «з-за недахопаў заканадаўства ў сферы барацьбы з карупцыяй і арганізаванай злачыннасцю».
Што да Харватыі, то з 1 студзеня 2023 года будзе адменены памежны кантроль на сухапутных і марскіх памежных пераходах Харватыі, а 26 сакавіка 2023-га — у аэрапортах.
Пры гэтым Балгарыя і Румынія далучыліся да Еўрасаюза раней за Харватыю, прытым даволі значна, на шэсць з паловай гадоў раней. Балгары і румыны сябры ЕС з 1 студзеня 2007 года, а харваты — з 1 ліпеня 2013-га.
Каментары