За абразу супрацоўнікаў міліцыі мінчуку прысудзілі год «хатняй хіміі» і шэсць тысяч рублёў кампенсацыі маральнай шкоды
У судзе Бярозаўскага раёна 6 снежня быў вынесены прысуд жыхару Мінска Раману Коржыку, якога абвінавацілі ў абразе прадстаўнікоў улады — шасці супрацоўнікаў міліцыі (арт. 369 Крымінальнага кодэкса), паведамляе «Вясна».
Справу разглядала суддзя Наталля Вакульчык.
Рамана Коржыка затрымалі 28 верасня 2022 года на трое сутак, затым ён знаходзіўся пад падпіскай аб нявыездзе.
Па матэрыялах абвінавачання, Коржык з 29 кастрычніка па 25 лістапада 2020 года ў тэлеграм-чатах размяшчаў каментары і абразлівыя выказванні ў дачыненні да супрацоўнікаў міліцыі з розных гарадоў, якія на яго думку былі датычныя да разгону масавых акцый пратэсту. Сярод пацярпелых — радавыя міліцыянты, участковыя інспектары, камандзір падраздзялення АМАПа, намеснік начальніка АУС.
Усе яны выставілі патрабаванні аб спагнанні ў іх карысць грашовай кампенсацыі маральнай шкоды.
Абвінавачаны прызнаў сваю віну і матэрыяльныя прэтэнзіі.
Суд пастанавіў прызначыць Раману Коржыку пакаранне ў выглядзе абмежавання волі без накіравання ва ўстанову адкрытага тыпу тэрмінам на адзін год, а таксама спагнаць з яго 6 000 рублёў матэрыяльнай кампенсацыі пацярпелым — па тысячы рублёў кожнаму.
Цяпер чытаюць
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы16
Каментары