«Мяне тройчы спрабавалі расстраляць». Падпалкоўнік, якога ўзялі ў палон «вагнераўцы», расказаў сваю версію падзей
Тэлеграм-канал «База» апублікаваў відэа з былым камандзірам 72-й мотастралковай брыгады Мінабароны РФ, падпалкоўнікам Раманам Венявіціным, які стаў знакамітым тым, што трапіў у палон да «вагнераўцаў». Венявіцін расказаў, што ён ваяваў у Чачні і Сірыі, цалкам падтрымлівае вайну ва Украіне, выказвае ўпэўненасць, што Расія пераможа, і дзеліцца сваёй версіяй сутычкі з ПВК «Вагнер».
«Як адбылося маё паланенне: я абʼязджаў свае падраздзяленні і перадавыя парадкі, шлях мне загарадзілі супрацоўнікі ПВК. Для гэтага не было падстаў. Цярпець гэта я, як баявы афіцэр, не збіраўся.
У выніку супрацоўнікі «Вагнера» былі раззброеныя і адпраўленыя ў вядомым кірунку: на х*й яны былі пасланыя», — кажа падпалкоўнік.
Але яго паланілі, кажа ён, і катавалі.
«Мяне паланілі, трымалі ў склепе, здзекаваліся так, як не здзекаваўся б любы азлоблены рускі салдат з палоннага салдата УСУ. Мяне збілі, не давалі спаць, тры разы за ноч мяне проста вывалаквалі са склепа і спрабавалі расстраляць. Відэа з маім допытам — гэта вынік ціску», — тлумачыць ён.
Ён цяпер ужо адмаўляе, што 72-я брыгада мініравала тылы ПВК «Вагнер» (пра гэта ён прызнаваўся на відэа, апублікаваным ПВК).
«Гэта трызненне сівой кабылы, гэта ўсё пі***ж. Гэта не тылы «Вагнера», гэта зона адказнасці 72-й брыгады. Гэта заява — гэта прадукт запалёнага розуму і піяр-службы «Вагнера» і спроба атакі на кіраўніцтва Мінабароны», — працягвае падпалкоўнік.
Ён кажа, што ад пачатку вайны з «вагнераўцамі» былі напружаныя стасункі.
«Напружанасць з «вагнерамі» ў мяне і маёй брыгады пачаліся з першых дзён перакідання нас на Арцёмаўскі кірунак (так ён называе Бахмут — НН).
Байцы ПВК «Вагнер» выкралі два танкі Т-80, чатыры гарматы, «Камаз», БМП», — сцвярджае Венявіцін.
«Быў выпадак, звязаны з пагрозай фізічнай расправы над байцамі роты РЭБ, якіх абяцалі акружыць і «абнуліць» толькі за тое, што яны працавалі не так, як хацелася «вагнерам». Быў выкрадзены старшына аднаго з нашых батальёнаў, яго мучылі, катавалі, пырскалі ў вочы кіслатой, аблівалі бензінам. Быў выкрадзены начальнік штаба, якога збілі і выкінулі звязаным у раёне баявых дзеянняў», — пералічае Венявіцін.
Ён прыводзіць і яшчэ адзін выпадак. «У красавіку — маі на маім участку адказнасці абмяркоўвалі абуральны выпадак, калі байца з суседняга злучэння «апусцілі», і той ад бязвыхаднасці проста скончыў жыццё самагубствам. Былі выпадкі, калі байцоў выкрадалі і спрабавалі памяняць іх на боепрыпасы», — кажа ён.
Падпалкоўнік назваў існаванне ПВК махноўшчынай і звярнуўся да Прыгожына: «Яўген Віктаравіч, вы займаецеся дыскрэдытацыяй УС РФ».
Венявіцін кажа, што падтрымлівае «спецаперацыю», Расія, паводле яго, пераможа ў «гэтай вайне з Украінай і НАТА», «дзякуючы яднанню вакол прэзідэнта РФ і ўзброеных сіл».
«Мы яшчэ прымусім пашкадаваць пра свае рашэнні кааліцыю заходніх краін», — нечакана скончыў прамову падпалкоўнік.
4 чэрвеня прэс-служба кіраўніка ПВК «Вагнер» Яўгена Прыгожына ў сваім тэлеграм-канале выклала відэа з палонным расійскім падпалкоўнікам. Той падчас допыту прызнае віну за напад яго салдат на «вагнераўцаў», бо сам быў у той момант «у стане алкагольнага ап'янення» і пры гэтым адчуваў «асабістую варожасць» да наймітаў.
Цяпер чытаюць
Арыштаваны чыноўнік, які мог стаць наступным міністрам аховы здароўя10
Каментары