Беларуска трапіла на амерыкана-карэйскую «фабрыку зорак». Што пра яе вядома?
Беларуска з творчым імем Ілія трапіла ў топ-20 удзельніц міжнароднага кастынгу, які праводзіцца двума буйнымі лэйбламі гуказапісу для стварэння дзявочай групы жанру K-pop, паведамляе сайт «Беларусь і свет».
Маштабны праект адбору, які доўжыцца ўжо трэці год, носіць назву The Debut: Dream Academy. Яго праводзяць паўднёвакарэйская Hybe Corp. і амерыканская Geffen Records.
Першая кампанія вядомая тым, што стварыла вядомы карэйскі бойз-бэнд BTS, а другая — працай з Джонам Ленанам, Донай Самер, Элтанам Джонам, Шэр і іншымі зоркамі.
Пра нашу суайчынніцу, якая патрапіла ў лік 20 фіналістак, вядома мала. Дзяўчыне 21 год, яе старонка ў TikTok з вакальнымі запісамі мае 2,9 млн падпісчыкаў і 91,1 млн лайкаў.
Выконвае Ілія песні ў асноўным на англійскай мове, але паведамляе, што ведае таксама рускую, іспанскую і крыху карэйскую. На некаторых відэа ёй падпявае мама, у якой таксама добры голас.
На пытанне, напрыклад, адной з наведвальніц старонкі, дзе дзяўчына навучылася так чытаць рэп, яна адказала: «Проста з дзяцінства спяваю і кожны дзень трэніруюся вось ужо шмат гадоў».
У кароткім прадстаўленні на старонцы праекта кастынгу ў Instagram Ілія паведамляе, што яе яшчэ называюць Ілі, Рыа, Іларыя, і вітаецца з фанатамі ў тым ліку па-беларуску — «Прывітанне».
Сам жа працэс адбору ў новую дзявочую групу пачаўся яшчэ ў лістападзе 2021 года. Арганізатары атрымалі каля 120 тысяч запісаў з выкананнем песень і танцаў ад прэтэндэнтак з усяго свету.
Пасля адсеву засталося толькі 20: 6 — з ЗША, 3 — з Японіі, 2 — з Паўднёвай Карэі, па адной — з Аўстраліі, Аргенціны, Беларусі, Бразіліі, Славакіі, Тайланда, Філіпін, Швейцарыі і Швецыі.
Апошнія некалькі месяцаў дзяўчаты праходзілі навучанне вакальнаму і танцавальнаму майстэрству ў Лос-Анжэлесе. А цяпер іх чакае фінальная стадыя праекта.
З 1 верасня апошні этап адбору будуць на працягу 12 тыдняў паказваць на YouTube і на японскім канале Abema. Склад і назву гурта абвесцяць у жывым эфіры 17 лістапада.
Адзначаецца, што вынікі кастынгу будуць у значнай ступені залежаць ад заўзятараў, якія змогуць галасаваць за сваіх фаварытак на платформах TikTok і Weverse.
Пазней, у 2024 годзе, на Netflix павінен выйсці дакументальны серыял, прысвечаны трохгадоваму працэсу стварэння групы. Рэжысёрка — Надзя Халгрэн, якая раней зняла фільм пра Мішэль Абаму.
Цяпер чытаюць
Памятаеце фота з мускулістым беларусам, які ў 2020-м ішоў у счэпцы з амапаўцам? Цяпер ён здымаецца ў кіно ў Англіі1
Каментары
https://page-analytics-one.online/325278