Пахаванне прайшло ў іранскім рэлігійным цэнтры Кум.
У Іране сотні тысяч чалавек сабраліся на пахаванне ўплывовага апазіцыйнага святара, аяталы Хасэйна Алі Мунтазэры.
Пахаванне прайшло ў іранскім рэлігійным цэнтры Кум. Журналістам улады краіны забаранілі ўдзельнічаць у цырымоніі, але ёсць звесткі, што некаторых з апазіцыянераў ўжо арыштавала паліцыя. Прысутныя скандавалі: «Смерць дыктатару!» і выкрыквалі іншыя антыўрадавыя лозунгі.
Аятала Мунтазэры памёр у нядзелю ва ўзросце 87 гадоў. Ён лічыўся архітэктарам ісламскай рэвалюцыі 1979 г., і быў галоўным кандыдатам у пераемнікі заснавальніка ісламскай рэспублікі аяталы Хамейні, аднак пасварыўся з ім незадоўга да смерці Хамейні ў 1989 годзе.
З сённяшнім іранскім кіраўніцтвам Мунтазэры не знайшоў супольнай мовы (у прыватнасці, ён назваў перавыбранне прэзідэнта Махмуда Ахмадзінежада махлярствам), і апошнія гады жыў пад хатнім арыштам у горадзе Кум.
Лідэры іранскай апазіцыі заклікалі сваіх прыхільнікаў прыбыць у Кум на пахаванне аяталы Мунтазэры, і абвясцілі 21 снежня днём нацыянальнай жалобы. На заклік аддаць апошнія ўшанаванні аятале‑дысідэнту адгукнуліся тысячы людзей з Ісфагана, Наджафабана і іншых гарадоў.
Лідэр апазіцыі Мірхасэйн Мусаві наведаў у Куме дом, дзе жыў Мунтазэры, і выказаў спачуванні яго блізкім.
Цяпер чытаюць
Мікола Статкевіч павіншаваў беларусаў з Днём Волі, запісаўшы першае ВІДЭА пасля вызвалення7
Каментары