Прычына ў няправільным харчаванні беларусаў.
Пра гэта «Медыцынскаму весніку» распавёў галоўны ўрач Мінскага гарадскога клінічнага анкалагічнага цэнтра (МГКАЦ), галоўны пазаштатны спецыяліст па анкалогіі камітэта па ахове здароўя Мінгарвыканкама Віктар Кандратовіч.
Па словах Кандратовіча, у МГКАЦ ужо рыхтуюць спецыялістаў, якія будуць працаваць выключна з ракам тоўстай кішкі. У планах таксама пашырэнне аддзялення цэнтра, якое займаецца каларэктальным ракам.
«Прычына каларэктальнага раку — характар харчавання сучаснага чалавека», — адзначае спецыяліст.
Ён тлумачыць, што пераход на фастфуд і скарачэнне ўжывання клятчаткі з'яўляюцца аднымі з галоўных прычын развіцця гэтага захворвання.
Таксама важную ролю адыгрывае несвоечасовая санацыя паліпаў, бо паліп тоўстай кішкі — гэта прадвеснік каларэктальнага раку. З моманту з'яўлення паліпа да развіцця пухліны можа прайсці ад пяці да сямі гадоў.
«Калі б пацыенты групы рызыкі, старэйшыя за 50 гадоў, хаця б раз на пяць гадоў рабілі каланаскапію і санацыю паліпаў, захворванне зменшылася б значна. Гаварыць з пацыентам аб неабходнасці такога кантролю, пераконваць яго павінна першаснае звяно — дактары паліклінік. Мы гатовы дапамагаць арганізацыйна-метадычнай дапамогай, але анкалагічная служба прызначана для лячэння пацыентаў з ужо даказаным ракам», — сцвярджае Кандратовіч.
Варта адзначыць, што рак тоўстай кішкі ўваходзіць у тройку найбольш частых анкалагічных захворванняў у Беларусі. Сярод мужчын найчасцей сустракаюцца рак лёгкіх, прастаты і каларэктальны рак. У жанчын — рак малочнай залозы, каларэктальны рак і анкалагічныя захворванні рэпрадуктыўнай сістэмы.
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў7
Каментары