У кастрычніку‑лістападзе 2010 года УП «Кінавідэапракат» плануе адкрыць у Мінску яшчэ адну лічбавую залу для паказу трохмернага кіно.
Пра гэта на прэс‑канферэнцыі 10 сакавіка паведаміў генеральны дырэктар прадпрыемства Васіль Коктыш.
Паводле яго слоў, лічбавая кіназала будзе адкрыта ў сталічным «Салюце».
У далейшых планах «Кінавідэапраката» — будаўніцтва пяцізалавага лічбавага кінатэатра на базе «Авангарда» ў мікрараёне Грушаўка. Нагадаем, першы 3D‑кінатэатр «Кіеў» пачаў працаваць у Мінску 12 студзеня 2010 года.
Як паведаміў Коктыш, сёння ў «Кіеве» праходзіць семінар «Лічбавы кінапаказ і трохмернае кіно» з удзелам замежных спецыялістаў — прадстаўнікоў кампаній «Кінатон» (Германія) і «Долбі» (Вялікабрытанія), з якімі супрацоўнічае УП «Кінавідэапракат». Замежныя спецыялісты правядуць тэхнічныя кансультацыі з работнікамі беларускага кінапракату, наведаюць кінатэатр «Салют» і ацэняць магчымасці яго пераабсталявання ў лічбавую кіназалу.
Як зазначыў Коктыш, за апошнія 10 гадоў «Кінавідэапракат» ажыццявіў вялікую працу па тэхнічным перааснашчэнні сталічнай кінасеткі. Паводле яго слоў, калі ў 1997—1998 гадах зношанасць абсталявання ў мінскіх кінатэатрах складала прыблізна 90%, то сёння — 36%. «Гэта больш чым камфортны стан», — заўважыў ён. У краінах былога СССР зараз не вырабляецца абсталяванне для кінапракату, таму Мінск у асноўным закупляе тэхніку з Германіі і Вялікабрытаніі, паведаміў Коктыш.
Летась сталічныя кінатэатры наведалі 3 млн. 720 тыс. гледачоў, што на 320 тыс. больш, чым у 2008 годзе. Паводле слоў Коктыша, ужо за два месяцы гэтага года кінатэатры наведалі 1 млн. 100 тыс. чалавек — на 250 тыс. больш, чым за аналагічны леташні перыяд. На балансе УП «Кінавідэапракат» знаходзяцца 14 кінатэатраў.
Каментары