Віцебскі аблвыканкам: Выказванні Герашчанкі «не адпавядаюць дзяржпадыходу і рэчаіснасці»
Магілёўцу Яўгену Андрэенку адказалі з КДБ і Віцебскага аблвыканкама на запыты пра выказванні віцебскага чыноўніка.
Магілёўцу Яўгену Андрэенку адказалі з КДБ і Віцебскага аблвыканкама на запыты пра выказванні віцебскага чыноўніка.
Яўген Андрэенка расказаў НН, што яго моцна абурылі словы віцебскага чыноўніка пра Беларусь і беларускую мову. Таму ён вырашыў пайсці далей за напісанне каментароў на сайтах незалежных СМІ і звярнуўся ў дзяржаўныя органы. На днях магілёвец атрымаў лісты з КДБ і Віцебскага аблвыканкаму. Адказ з Камітэту за подпісам першага намесніка старшыні Віктара Вягеры прыйшоў па-расійску.
У ім гаворыцца, што ў выніку праверкі ў дзеяннях Герашчанкі А.Я. не было знойдзена прыкметаў злачынства, прадугледжаныя арт. 130 «Распальванне расавай, нацыянальнай, рэлігійнай варожасці або розні».
У адрозненне ад КДБ, з аблвыканкаму адказалі па-беларуску. Але не толькі гэтым адрозніваецца ліст, падпісаны намеснікам старшыні Леанідам Кавалёвым. Найперш Леанід Леанідавіч падзякаваў Яўгену Андрэенку за ўвагу і клопат пра беларускую мову, літаратуру і культуру.
«Што датычыць выказванняў Герашчанкі А.Я., то, безумоўна, яны не адпавядаюць дзяржаўнаму падыходу і рэчаіснасці, і недапушчальныя з боку адказнай асобы. Аб гэтымі адбылася адпаведная размова з Герашчанкам А.Я.», — гаворыцца ў лісце з аблвыканкаму.
Адказ з Віцебскага гарвыканкаму Яўген Андрэенка пакуль не атрымаў.
Нагадаем, што выказванні віцебскага чыноўніка актыўна абмяркоўваліся на форумах сайтаў незалежных СМІ. Неаднойчы гучалі прапановы даць ацэнку яго дзеянням з пункту гледжання закону. На словы Герашчанкі вымушаныя былі рэагаваць ўлады: чыноўнік атрымаў вымову па месцы працы, заўвагу яму зрабіў кіраўнік Адміністрацыі прэзідэнта Уладзімір Макей, а ў «Советской Белорусии» кіраўніку «Русского дома» мякка параілі не блытаць пісьменніцкае і чыноўніцкае.
Цяпер чытаюць
Справа Софтклуба: затрыманы патрыярх беларускага ІТ Уладзімір Сіротка і некалькі топ-менеджараў. Яны падарылі нам АРІП16
Каментары