«Заказаў больш, чым машын на лініі». Кіраўнік «А1 таксі» — пра цэны і беларускую мову ў дадатку
У пачатку мая тэлекамунікацыйная кампанія «А1» запусціла ў Беларусі свой сэрвіс таксі. Яны зрабілі стаўку на фіксаваныя цэны на паездкі, якія не будуць залежаць ад надвор'я ці яшчэ якіх-небудзь фактараў. Пакуль новае таксі даступна толькі ў Мінску. Кіраўнік «А1 таксі» Яўген Ляўданскі расказаў Office Life, як маецца сэрвіс.
«А1» вырашыла выйсці на рынак таксі з восені 2024 года. Для гэтага кампанія набыла аднаго з вядомых гульцоў — службу таксі «Баварыя». У сакавіку 2025 года стала вядома аб запуску сэрвісу з 1 мая. На старце ў «А1 таксі» было больш за 3 тысячы машын.
«Зараз заказаў больш, чым машын на лініі», — кажа Яўген Ляўданскі.
«Што тычыцца тэхнічных пытанняў, то мы слухаем два бакі. Напрыклад, кіроўцы паскардзіліся, што кнопка «Трывога» ў дадатку занадта яркая і вялікая, і яны часта выпадкова яе краналі. Пасажыры прасілі дадаць беларускую мову ў дадатак. Мы на старце не паспелі гэта зрабіць, паскорыліся — і цяпер яна ёсць у новым рэлізе».
Ляўданскі прызнае, што «Яндэкс таксі» — моцны канкурэнт.
«Але мы бачым, што ў чымсьці ён спрабуе ісці за намі, і гэта мяняе рынак. Напрыклад, мы не ўводзілі асобныя тарыфы для пасажыраў з дзецьмі або жывёламі. Цяпер бачым, што ў іншых службаў у раздзеле «Тарыфы» насупраць графы «дзіцячае крэсла» напісана «не больш за 0 рублёў». Праўда, калі пры замове выбіраеш тарыф «Дзіцячы» і тое, якое аўтакрэсла трэба, цана павялічваецца. Упэўнены, кліент разбярэцца».
«А1 таксі» зрабіла стаўку на фіксаваныя тарыфы. Па назіраннях пасажыраў, гэта даражэй, чым у іншых таксі. Ляўданскі заўважае:
«Як можна параўноўваць, калі ехалі ў адзін бок — была адна цана, а вяртаецеся тут жа назад — ужо ў два разы даражэй? Або ехалі за 10 рублёў, дождж пайшоў — ужо 40… Мы за якасць, стабільнасць і празрыстасць. Мы задаволеныя, што пасля нашай заявы аб выхадзе на рынак цэны ў канкурэнтаў тут жа знізіліся. Для спажыўца гэта добра.
Нашы тарыфы фіксаваныя, яны эканамічна абгрунтаваныя. Упэўнены, што гэтыя арэлі «ўверх-уніз» з цэнамі хутка скончацца. Рынак ад гэтага ўжо стаміўся. Тарыфы, якія ніжэйшыя за эканамічна абгрунтаваныя выдаткі, проста «выпальваюць» усіх перавозчыкаў. Гэта не пра развіццё бізнэсу. Бо перавозчыку неабходна абнаўляць аўтапарк, а для гэтага патрэбна рэнтабельнасць».
Пакуль «А1 таксі» працуе толькі ў Мінску, але плануе пашырацца і на рэгіёны.
Цяпер чытаюць
«Гэта шлях адзіночкі». Беларус большую частку жыцця праводзіць у вандроўках — наведаў ужо амаль 500 аб’ектаў ЮНЕСКА2
Каментары