Украіна ўвяла санкцыі супраць завода ў Беларусі, які вырабляе дэталі снарадаў для расійскіх «Градаў»
Завод дакладнай электрамеханікі ў Станькаве з'яўляцца адным з 16 беларускіх прадпрыемстваў, датычных да забеспячэння расійскіх сістэм залпавага агню.
Прэзідэнт Украіны Уладзімір Зяленскі зацвердзіў сваім указам рашэнне Рады нацыянальнай бяспекі і абароны аб санкцыях супраць фізічных і юрыдычных асоб з Расіі, Беларусі і Кітая за падтрымку расійскай агрэсіі супраць Украіны. Пра гэта паведамляе Беларуская служба «Радыё Свабода».
Як адзначаецца ў апублікаваным тэксце ўказа, Украіна ўвяла санкцыі супраць Рэспубліканскага вытворчага ўнітарнага прадпрыемства «Завод дакладнай электрамеханікі», што знаходзіцца ў Станькаве Дзяржынскага раёна Мінскай вобласці.
Гэты завод, паводле расследавання арганізацыі былых сілавікоў BelPol, з’яўляецца адным з 16 беларускіх прадпрыемстваў, што ў той ці іншай ступені задзейнічаныя ў вытворчасці дэталяў снарадаў для расійскіх сістэм залпавага агню БМ-21 «Град».
Згодна з рашэннем, санкцыі ўводзяцца на 10 гадоў. Сярод абмежаванняў — блакіроўка актываў, забарона на ўдзел у дзяржаўных тэндарах, прыватызацыі і гандлёвых аперацыях.
Прэзідэнт Зяленскі паведаміў, што гэтымі санкцыямі ва Украіне пачалася «вялікая праца» па ўвядзенні абмежаванняў супраць тых, хто дзейнічае на часова акупаваных тэрыторыях, апраўдвае агрэсію або спрыяе Расіі ў яе рэалізацыі.
«Выяўляем усе схемы, што працуюць на карысць акупанта і, як вынік, — супраць Украіны, і блакіруем іх. Працуем таксама над поўнай сінхранізацыяй украінскіх санкцый з рашэннямі партнёраў», — заявіў Зяленскі.
Завод дакладнай электрамеханікі займаецца распрацоўкай і вытворчасцю вайсковай прадукцыі, а таксама прадастаўляе тэлекамунікацыйныя паслугі. Гэта галаўное прадпрыемства па распрацоўцы і вытворчасці ракетнага ўзбраення, у тым ліку рэактыўнай сістэмы залпавага агню В-200 «Паланэз» і комплексу В-300РК «Паланэз-М», якія Расія выкарыстоўвае падчас вайны ва Украіне.
Еўрасаюз увёў санкцыі супраць гэтага прадпрыемства ў лютым 2024 года ў межах 13-га пакета. Да іх далучыліся і шэраг краін-партнёраў Еўрасаюза.
Цяпер чытаюць
«Шкада, што людзі мяне лічаць такім ідыётам». Дзядок расказаў, як яго змаглі высачыць пасля пяці месяцаў падполля1
Каментары
Яны ёсць толькі на узбраенні у Беларусі і Азербайджана. Патрабуецца дазвол ад Кітая пры продажы,таму што гэта сумесная распрацоўка. Кітайцы далі дазвол толькі на продаж Азербайджанцы.
1. доўгатэрміновая залежнасць ад Расіі па паліву для АЭС
2. прамы урон абароназдольнасці Беларусі
3. масавае глумленне спецыялістаў як у калоніях, так і на волі
і аніводнага пацярпелага церцеля