У школах анексіраваных рэгіёнаў расійскія ўлады спыняюць вывучэнне ўкраінскай мовы і літаратуры
Міністэрства асветы Расіі ў канцы мінулага тыдня апублікавала праект загаду аб зменах у федэральнай вучэбнай праграме для школ. Дакумент цалкам выключае з праграмы навучальны прадмет «Родная (украінская) мова». Ведамства таксама прапануе спыніць вывучэнне ўкраінскай літаратуры з 1 па 9 клас, піша «Агенцтва».
У 2023—2024 гадах украінскую мову як родную вывучалі ў Запарожскай і Херсонскай абласцях, а раней — па заявах бацькоў таксама ў так званых «ДНР», «ЛНР», Крыме і Башкартастане.
Паводле цяперашняй праграмы, украінскую мову як родную рэкамендавалася вывучаць 736 гадзін: 260 гадзін — у 1—4 класах, 340 — у 5—9 класах, 136 — у 10—11 класах.
Праект загаду прадугледжвае поўную адмену курсу. Праект загаду таксама выключае з праграмы курс украінскай літаратуры як роднай з 1 па 9 клас.
У існуючай праграме на гэты прадмет адводзілася 282 вучэбныя гадзіны: 112 — у 1—4 класах, 170 — у 5—9 класах. Украінская літаратура застаецца толькі ў праграме 10—11 класаў.
У тлумачальнай запісцы да дакумента гаворыцца, што гэтыя змены ўносяцца «ў сувязі са змененай геапалітычнай сітуацыяй у свеце».
Выключэнне ўкраінскай мовы з вучэбнай праграмы ў анексіраваных украінскіх рэгіёнах супярэчыць таму, што расійскія ўлады заяўляюць публічна.
Пуцін неаднаразова заяўляў, што Расія з павагай ставіцца да ўкраінскай культуры і мовы. «Ніколі не дапускалі нічога падобнага да таго, што ва Украіне дазваляецца ў дачыненні да рускай культуры і мовы», — казаў ён у кастрычніку 2022 года.
У лістападзе мінулага года Пуцін заклікаў не «паўтараць памылак мінулага» ў сферы вывучэння ўкраінскай мовы ў анэксіраваных рэгіёнах.
«Наша палітыка ў дачыненні да рускай мовы павінна быць мяккай, натуральнай, заснаванай на патрэбах жыцця», — заявіў кіраўнік дзяржавы.
Статус рускай мовы актыўна выкарыстоўваўся расійскімі ўладамі для апраўдання вайны з Украінай. Пункт пра рускую мову прысутнічае і ў расійскім мемарандуме аб заканчэнні вайны, які Масква перадала Кіеву.
У дакуменце Расія патрабуе «надання афіцыйнага статусу рускай мове» (згодна з законам 2019 года, адзінай дзяржаўнай мовай ва Украіне з’яўляецца ўкраінская).
Цяпер чытаюць
Стаў вядомы сэнс крымінальнай «справы страхаўшчыкоў»3
Каментары