Стасевіч стаў рэкардсменам Беларусі па колькасці матчаў. Яму падарылі лукашэнкаўскі мерч, хаця дома футбаліст у чорным спісе
39-гадовы паўабаронца «Атыраў» Ігар Стасевіч правёў 732 матчы на прафесійным узроўні і стаў абсалютным рэкардсменам Беларусі. Ён абышоў Аляксандра Глеба, які раней утрымліваў першынство ў Клубе Сяргея Алейнікава — асацыяцыі беларускіх футбалістаў, што згулялі больш за 500 афіцыйных матчаў на найвышэйшым узроўні. Але дома гуляць Стасевічу не далі.
Перад рэкордным матчам у Актобе прадстаўнік АБФФ Ігар Цаплюк павіншаваў гульца з дасягненнем, абгарнуў яго чырвона-зялёным сцягам, уручыў гадзіннік «Луч» і бомбер з лукашэнкаўскага мерча з прозвішчам Стасевіча.
Нягледзячы на выдатную кар’еру і заслугі перад беларускім футболам, Ігар Стасевіч не можа працягваць выступаць у Беларусі.
Пасля падзей 2020 года яго прозвішча трапіла ў чорны спіс. Хоць ён запісаў так званае пакаяннае відэа, у 2022 годзе ягонае магчымае вяртанне ў мінскае «Дынама» было асабіста забаронена тагачасным міністрам спорту Сяргеем Кавальчуком.
У выніку Стасевіч вымушаны працягваць кар’еру за мяжой — цяпер ён зноў іграе ў казахстанскім «Атыраў», дзе ўжо выступаў раней.
Стасевіч за сваю кар’еру паспеў выступіць за БАТЭ, мінскае «Дынама», «Атыраў», «Гомель», «Шахцёр» і іншыя каманды.
У ягонай біяграфіі — 10 тытулаў чэмпіёна Беларусі, 5 перамог у Кубку краіны, званні найлепшага футбаліста чэмпіянату (2014, 2015, 2016, 2018, 2019) і найлепшага футбаліста Беларусі (2015, 2018, 2019). Ён таксама прымаў удзел у групавых этапах Лігі чэмпіёнаў і Лігі Еўропы, а ў сезоне 2018/2019 стаў найлепшым асістэнтам у Лізе Еўропы.
Цяпер чытаюць
Выйшаў на свабоду былы топ-журналіст АНТ Дзмітрый Семчанка6
Каментары