На пасяджэнні Мінгарвыканкама 25 верасня гарадское кіраўніцтва абмеркавала планы па горадабудаўніцтве і развіцці інфраструктуры. Развіццё Мінска ў будучыні будзе праводзіцца паводле ўзважанай і сістэмнай стратэгіі, піша агенцтва «Мінск-Навіны».
Старшыня Мінгарвыканкама Уладзімір Кухараў адзначыў, што Мінск — кампактны горад, таму ўсе новыя забудовы трэба планаваць вельмі ўважліва, каб яны адпавядалі заканадаўству і наяўнай структуры горада.
Асаблівая ўвага будзе надавацца не толькі цэнтральным раёнам, але і ўскраінам, а таксама будаўніцтву жылля ў гарадах-спадарожніках, стварэнню неабходнай інфраструктуры і аналізу тэрыторый для новых аб’ектаў — як жылых, так і адміністрацыйных ці прамысловых.
Старшыня камітэта архітэктуры і горадабудаўніцтва Віктар Гуцько падкрэсліў, што генеральны план горада прадугледжвае захаванне насельніцтва Мінска на ўзроўні двух мільёнаў чалавек. Для стрымання росту горада рэалізуецца стратэгія фарміравання агламерацыі разам з гарадамі-спадарожнікамі.
Развіццё горада будзе грунтавацца на падзеле Мінска на дзевяць вялікіх раёнаў, якія можна ўспрымаць як «унутраныя гарады».
У кожным раёне будуць размяшчацца аб’екты абслугоўвання насельніцтва, зоны адпачынку, спартыўныя пляцоўкі, культурныя і забаўляльныя цэнтры, а таксама працоўныя месцы.
Плануецца, што тэрыторыя горада крыху павялічыцца — прыкладна на 3,3 тысячы га, да 38,1 тысячы га, а колькасць насельніцтва вырасце на 25—30 тысяч чалавек. Асноўныя змены запланаваны ў паўночным і ўсходнім сектарах горада.
У паўночным сектары цяпер рэалізуецца інвестыцыйны праект «Паўночны Бераг», а ва ўсходнім будуць з’яўляцца новыя жылыя раёны каля аграгарадка Калодзішчы і ў масіве Зялёны Бор. Прадугледжана таксама будаўніцтва неабходнай сацыяльнай інфраструктуры для новых раёнаў, а развіццё прамысловых зон будзе ажыццяўляцца ў сучасных формах: тэхналагічныя паркі, навукова-вытворчыя аб’яднанні і развітая абслугоўваючая інфраструктура.
Развіццё транспартнай сістэмы Мінска працягнецца. Транзітныя патокі транспарту будуць выведзеныя з трэцяга гарадскога кальца, замест гэтага будуць пабудаваныя дзве паўкальцавыя магістралі з параметрамі гарадскіх праспектаў. Гэта дазволіць павялічыць плошчу паркаў і набярэжных. Плануецца будаўніцтва трэцяй лініі метро і праектаванне чацвёртай, а таксама павелічэнне перавозак чыгуначным транспартам праз станцыю «Мінск-Пасажырскі».
У горадзе працягваецца стварэнне сучасных веладарожак, якія будуць праходзіць побач з асноўнымі зонамі масавага прыцягнення людзей.
Цяпер чытаюць
Што вядома пра затрыманых радыёаматараў, якім пагражае аж да расстрэлу6
Каментары