У садовым таварыстве саюза беларускіх пісьменнікаў «Узгор'е-2» выставілі на продаж дачны дом, у якім жыў беларускі пісьменнік Алесь Бачыла, заўважыла выданне Realt.by.
Садовае таварыства «Узгор'е-2» знаходзіцца за 17 кіламетраў ад Мінска ў Маладзечанскім напрамку і за чатыры кіламетры ад Заслаўя. З Мінска туды ходзіць маршрутка і аўтобус ад станцыі метро «Пушкінская». Ад дома прыпынак за дзесяць хвілін хады.
Таварыства размяшчаецца на горцы і акружана лесам. Два разы на тыдзень туды прыязджае аўталаўка. Дарогу да таварыства чысцяць і зімой, некаторыя суседзі жывуць тут круглы год. Увесь сезон працуе і крама.
Дача, выстаўленая на продаж, двухпавярховая. На першым паверсе — два пакоі і кухня. Другі паверх мансардны, там трэба рабіць рамонт. Агульная плошча — 56 квадратных метраў. Дом са зруба. Вада тут сезонная, а ацяпленне пячное.
Плошча ўчастка — 4,28 соткі. На ім высаджаны газон. Ёсць летняя кухня.
Агент, які займаецца продажам, кажа, што гэта дача Алеся Бачылы — беларускага пісьменніка, які нарадзіўся ў 1918‑м і памёр у 1983 годзе. Алесь Бачыла быў заслужаным дзеячам культуры БССР, ён вядомы як паэт, празаік, драматург, перакладчык і рэдактар. Беларусы могуць ведаць аўтара па вершах, якія вучылі ў школе, а яшчэ менавіта Бачыла — аўтар знакамітай песні «Радзіма мая дарагая», якая адзін час нават прэтэндавала на ролю дзяржаўнага гімна.
Дача беларускага пісьменніка выстаўлена на продаж за 20 тысяч даляраў.
Цяпер чытаюць
Уводзяць адказнасць за прапаганду гомасэксуальнасці, бяздзетнасці, а таксама за незаконнае прадстаўленне Беларусі на міжнароднай арэне26
Каментары