Супэрмаркеты ў Віцебску
Брытанская кампанія “Willisden Industries Limited” мае збудаваць у Віцебску два гандлёвыя цэнтры: на Новааршанскай шашы ў раёне тэлезаводу — унівэрсам; у раёне пасёлку Білева — гіпэрмаркет. Праекты пакуль абмяркоўваюцца. Брытанская кампанія плянуе за 4—5 гадоў укласьці ў разьвіцьцё розьнічнай гандлёвай сеткі Беларусі 125 млн даляраў. У верасьні кампанія пачала будаўніцтва першага супэрмаркету (плошчай 5,5 тыс. кв.м) у Менску, у раёне аўтавакзалу “Ўсходні”.
Таксоўкі мусяць пажаўцець
Новы нацыянальны стандарт СТБ 1389-2003 пачынае дзейнічаць у Беларусі з 1 лістапада. Згодна зь ім, таксоўкі павінны быць пафарбаваныя толькі ў жоўты колер ці хоць бы мець жоўты пас. Патрабаваньні Дзяржстандарту, адпаведныя міжнародным нормам, пашыраюцца і на маршрутныя таксоўкі. Так, шыльдачка з апісаньнем маршруту павінна быць пэўнага фармату і не на паперы, а на цьвёрдым матэрыяле.
Нацыяналізацыя страхаваньня транспарту
Абавязковае страхаваньне транспарту будзе перададзенае ў кампэтэнцыю выключна дзяржаўных страхавых кампаніяў “Белдзяржстрах”, “Белэксімгарант” і “Стравіта”. На іх долю з новага году будзе прыпадаць больш за два мільёны транспартных сродкаў, зарэгістраваных у Беларусі. Пастанову Саўміну аспрэчваюць чатыры сотні прыватных страхавікоў.
Новы “Опэль-Сыгнум”
На беларускім рынку зьявіцца новы аўтамабіль — “Opel Signum”. Ён будзе прэзэнтаваны 19 кастрычніка ў аўтасалёне “Opel”. У Эўропе машыну прэзэнтавалі ў красавіку. Пры габарытах звычайнага сэдану (даўжыня 4 м 80 см) ён мае вельмі вялікую колавую базу, што дадае камфорту ў часе язды. Упершыню ўстаноўленая ў новым “Opel Signum” сыстэма “Travel Assistant” ператварае месцы на заднім сядзеньні ў офіс ці кінатэатар. Каштуе новы опэль 16.800 эўра.
Новае ў справе балтыйскага газаправоду
Расейскі канцэрн “Газпром” шукае партнэраў для будаўніцтва газаправоду з Расеі ў Заходнюю Эўропу па дне Балтыйскага мора. У мінулую пятніцу наконт гэтага праекту, кошт якога ацэньваецца ў 7 млрд даляраў, вяліся перамовы з прадстаўнікамі фірмы “E.ON”. “Газпром” паведаміў таксама, што зацікаўленасьць у будаўніцтве новага газаправоду выказваюць яшчэ “Royal Dutch/Shell Group”, “Total SA”, “Wintershall” i “Fortum Oil”. Разьліковая магутнасьць газаправоду — 30 млрд кубоў газу ў год.
СП; БелаПАН
Каментары