У Добрушы бабёр прыйшоў у паліклініку і заснуў пры ўваходзе
Раніцай 6 мая ў Добрушы бабёр зайшоў на вуліцу князя Паскевіча, дзе знаходзяцца дзіцячы сад №4 і раённая паліклініка. Незвычайнага «пацыента» заўважылі работнікі дзіцячага сада каля сёмай гадзіны раніцы, піша «Добрушскі край».
Жывёліна выглядала спакойнай, але збітай з панталыку. Спробы адагнаць бабра назад да ракі не мелі поспеху — звярок атабарыўся каля ганка паліклінікі і, па словах відавочцаў, уладкаваўся паспаць.
Ратаваць сітуацыю ўзяліся супрацоўнікі «Добрушскага камунальніка». Ім удалося злавіць бабра і выпусціць яго ў раку. Паводле папярэдніх ацэнак, жывёліна не пацярпела і адчувае сябе добра.
Прычыны, па якіх бабёр апынуўся ў цэнтры горада, не ўдакладняюцца.
Чытайце таксама:
У Чэхіі бабры за ноч пабудавалі плаціну там, дзе яе ўзвядзенне доўга не маглі ўзгадніць чыноўнікі
Сквер у цэнтры Мінска аблюбавалі бабры, яны ўпарта грызуць дрэвы