Хворага амерыканца, які нелегальна заехаў у Беларусь у таварным вагоне, аддалі бацькам
Амерыканец Антон Рос, які незаконна заехаў у Беларусь у таварным вагоне ў сакавіку, пакінуў краіну, паведаміў тэлеканал «Беларусь-1». У Беларусь па яго прыехалі бацька — грамадзянін ЗША і маці — грамадзянка Украіны.
Антон Рос
«Антон Рос разам з бацькамі перасёк беларускую мяжу ў ноч на 8 мая. Наперадзе невялікі прыпынак у Літве, а далей дарога дадому [у Чэхію, дзе жыве маці Антона]», — паведамляе тэлеканал.
Маці ў сюжэце тэлеканала расказала, што ў хлопца ёсць праблемы са здароўем, у тым ліку з памяццю.
Антона Роса затрымалі 31 сакавіка 2025 года пры праверцы грузавога саставу, які прыбыў з Літвы. Хлопца абвінавацілі ў незаконным перасячэнні мяжы і прызначылі адміністрацыйнае пакаранне ў выглядзе штрафу. Але яму доўга не давалі пакінуць Беларусь, за што змагалася ягоная маці, якая і раней расказвала пра амнезію Антона.