Амерыканец, якога знайшлі ў таварным вагоне ў Маладзечне, двойчы спрабаваў трапіць у Беларусь афіцыйна. Яго дэпартуюць
Памежны камітэт расказаў падрабязнасці затрымання амерыканца, якога знайшлі ў вагоне таварнага цягніка.
Грамадзянін ЗША, якога напярэдадні знайшлі ў пустым таварным вагоне ў Маладзечне, будзе дэпартаваны назад у Літву.
Мужчына 24 сакавіка двойчы спрабаваў уехаць на тэрыторыю Беларусі афіцыйна: раніцай праз пункт пропуску Каменны Лог, а вечарам таго ж дня — праз памежны пераход Беняконі, піша Памежны камітэт.
Аднак пры праходжанні памежнага кантролю ён не змог пацвердзіць наяўнасць сродкаў, неабходных для пакрыцця выдаткаў па яго знаходжанні ў Беларусі і выездзе з краіны. Таму памежнікі двойчы адмовілі амерыканцу ва ўездзе.
Мужчына атрымае адміністрацыйнае пакаранне за незаконнае перасячэнне мяжы, пасля чаго яго адправяць у Літву.
Каментары