Карпянкоў заявіў, што 90% навабранцаў хочуць служыць па кантракце
17 мая прызыўнікі ўнутраных войскаў Беларусі прынялі прысягу. 260 чалавек зрабілі гэта ў васковай часці 3214, якая запомнілася ўдзелам у 2020-м годзе ў разгоне мірных пратэстаў. У часці прысутнічаў і намеснік міністра ўнутраных спраў, камандуючы ўнутранымі войскамі Мікалай Карпянкоў, паведамляе СТБ.
Мікалай Карпянкоў. Фота: СТБ
«Мы ўкамплектаваныя больш чым на 100%. Прыйшло вельмі добрае маладое папаўненне, крэатыўныя хлопцы з добрым пачуццём гумару, з добрай адукацыяй, выдатныя спартсмены», — заявіў Карпянкоў.
Ён заявіў, што прызваныя маладыя людзі, маўляў, «вельмі высока маральна зараджаныя».
«За гэтыя тры тыдні ўжо 90% выказала жаданне служыць па кантракце. І яны кажуць: «Мы хочам служыць у спецназе, мы зараджаныя, і мы будзем выконваць задачы там, куды нас пашле Радзіма», — сказаў намеснік міністра ўнутраных спраў.