У Гродне паказальна выдварылі з Беларусі таджыка і туркмена
У Гродне паказальна выдварылі з Беларусі двух маладых іншаземцаў — аднаго з Таджыкістана, другога з Туркменістана. Паводле міліцыі, гэта было зроблена ў рамках прафілактычнай акцыі, на якую запрасілі таксама студэнтаў з Туркменістана і працоўных мігрантаў з Азербайджана.
Фота: t.me/Neman102
Малады грамадзянін Туркменістана (2000 года нараджэння) у нецвярозым стане справіў натуральную патрэбу каля адной з забаўляльных устаноў у Гродне, а таксама пасварыўся і зладзіў бойку з іншаземцамі. За гэта на яго склалі два пратаколы за дробнае хуліганства.
Другі — грамадзянін Таджыкістана — быў раней папярэджаны пра неабходнасць пакінуць Беларусь, але не зрабіў гэтага. Ён растлумачыў, што нядаўна ажаніўся, і ў красавіку ў яго нарадзілася дачка.
Пры разглядзе выпадкаў улічылі характар парушэнняў, наяўнасць сваякоў у Беларусі і характарыстыкі гэтых людзей. У выніку было вырашана: грамадзяніна Туркменістана выдварылі з краіны на паўгода, а грамадзяніну Таджыкістана таксама забаранілі ўезд у Беларусь на той жа тэрмін.
Раней падобны выпадак адбыўся ў Брэсце, што сведчыць пра агульнабеларускі характар кампаніі публічнай і паказальнай дэпартацыі іншаземцаў з мэтай запалохвання іншых.
Чытайце таксама:
На дзяржаўным ТБ даводзяць, што мігранты ў Беларусі дысцыплінаваныя, а таксістаў-замежнікаў няшмат