Супрацоўнікі Луўра прыпынілі страйк, нічога не дабіўшыся
Музей Луўр у Парыжы ў поўным аб’ёме аднавіў працу 19 снежня пасля таго, як супрацоўнікі прагаласавалі за спыненне страйку, які раней часткова прыпыніў дзейнасць установы. Як паведамляе Associated Press, рашэнне было прынята на агульным сходзе супрацоўнікаў Луўра, дзе яны аднадушна падтрымалі спыненне страйку, каб музей змог прымаць наведвальнікаў.
Уваход у Луўр. Фота: AP Photo / Emma Da Silva
Прафсаюзы адзначылі, што спыненне страйку адбылося пасля пяці сустрэч з прадстаўнікамі Міністэрства культуры Францыі, але падкрэслілі, што дасягнутага прагрэсу недастаткова, асабліва ў пытаннях кадравай забяспечанасці, аплаты працы і доўгатэрміновых планаў бяспекі. Таксама яны выказалі заклапочанасць станам будынка і ўмовамі працы.
Супрацоўнікі крытыкавалі прэзідэнтку Луўра Ларанс дэ Кар за адсутнасць зацікаўленасці падчас страйку, бо яна не сустракалася з персаналам і не вяла з імі камунікацыю. 5 студзеня супрацоўнікі правядуць новы сход, каб вырашыць, ці аднаўляць страйк.
Страйк пачаўся 15 снежня з-за перагрузкі супрацоўнікаў, патрабаванняў павелічэння найму, павышэння заробкаў і пераразмеркавання выдаткаў. У кастрычніку Луўр трапіў у сусветныя навіны праз 7‑хвіліннае скандальнае рабаванне, што выклікала пытанні пра якасць мераў бяспекі ў музеі.
Чытайце таксама:
У Луўры чарговая бяда: здарыўся патоп
Паролем ад камер відэаназірання ў абрабаваным Луўры было слова «Луўр»
Падазраваны ў рабаванні Луўра расказаў пра замову ад «мужчын са славянскім акцэнтам»
Пасля выкрадання каштоўнасцей з Луўра, яго скарбы схавалі ў падземным сховішчы Банка Францыі
Шкоду ад скрадзеных з Луўра каштоўнасцяў ацанілі ў 88 мільёнаў еўра