Paŭstancy ŭ Demakratyčnaj Respublicy Konha zachapili biełaruskija bieśpiłotniki

Ruandyjskaje infarmahienctva apublikavała fota zachoplenaj paŭstancami z hrupoŭki M23 u aeraporcie Homy (najbujniejšy horad na ŭschodzie Demakratyčnaj Respubliki Konha) vajskovaj techniki, u tym liku ŭpakavanych u draŭlanyja skryni novych BPŁA. Jany nie adroźnivajucca ad bieśpiłotnaha latalnaha aparata Bierkut-VM biełaruskaj vytvorčaści, piša Reform.news.

Na fota bačna, što adna sa skryń była ŭskrytaja i ŭnutry znachodzicca bieśpiłotnik z reaktyŭnym ruchavikom. Kryły zdymajucca i spakavanyja asobna.

Na dnie lažyć knižyca z vyraznym nadpisam na ruskaj movie «Etikietka» i razmašystym podpisam. Usiaho ŭ anhary možna zaŭvažyć kala 20 zialonych skryń z novymi BPŁA.

Anałahičny aparat pakazaŭ telekanał Minabarony Biełarusi ŭ mai 2020 hoda. Vyrab šmat razoŭ demanstravali publična na vystavach, u tym liku prezientavali Łukašenku.

«Bierkut-VM» — biełaruski bieśpiłotny latalny aparat, raspracavany KB «Indeła». Pieršapačatkova ŭjaŭlaŭ ź siabie pavietranuju mišeń, zdolnuju imitavać kryłatuju rakietu i transpartny samalot. U ŚMI była infarmacyja ab pastaŭkach bieśpiłotnika ŭ Anhołu ŭ lutym 2019 hoda.

27 studzienia paŭstanckaja hrupoŭka «Ruch 23 sakavika» (M23), jakaja pradstaŭlaje intaresy etničnaj mienšaści tutsi, pry padtrymcy vajskoŭcaŭ z susiedniaj Ruandy ŭstanaviła kantrol nad Homaj, klučavym administracyjnym i ekanamičnym centram na ŭschodzie Demakratyčnaj Respubliki Konha, stalicaj pravincyi Paŭnočnaje Kivu. Byŭ zachopleny miascovy aeraport, dzie zachoŭvałasia vajskovaja technika. 

U 2021 hodzie ŭ Demakratyčnaj Respublicy Konha paśla sustrečy z byłym prezidentam Žazefam Kabiłam zatrymlivali biełaruskich praŭładnych biznesmienaŭ Alaksandra Zinhmana i Aleha Vodčyca, jakija prasoŭvajuć intaresy režymu Łukašenki ŭ Afrycy. Tady ich zapadozryli akurat u niezakonnych ździełkach, źviazanych z handlem zbrojaj. Adnak ža praź niekatory čas abodvuch biełarusaŭ adpuścili.

Kamientary da artykuła