«Kultura i mastactva» praviała na piensiju hałoŭnuju redaktarku. Ni słova pa-biełarusku

Cyrymonija provadaŭ pakazała stupień maralnaj i prafiesijnaj dehradacyi dziaržaŭnych ŚMI.

Namieśnik dyrektara ŭstanovy «Kultura i mastactva» Vasil Śvistunoŭ, Ludmiła Krušynskaja, dyrektarka ŭstanovy Natalla Kuźniacova, načalnica adździeła mižnarodnaha supracoŭnictva i ŭzajemadziejańnia sa ŚMI Ministerstva kultury Viktoryja Ratabylskaja. Fota: kultinfa / Telegram

Ludmiła Krušynskaja z 1995 pa 2012 hod była hałoŭnaj redaktarkaj haziety «Kultura», a paśla — dyrektarkaj redakcyjna-vydavieckaj ustanovy. Mienavita pry joj u 2002 hodzie adbyłosia abjadnańnie haziety «Kultura» i časopisa «Mastactva» ŭ adnu ŭstanovu.

Apošnija hady jana zajmała pasadu pamočnicy dyrektarki. Jana łaŭreatka premii «Za duchoŭnaje adradžeńnie» i maje zvańnie «zasłužanaja žurnalistka».

Internet-staronka «Kultury i mastactva» vyhladaje tak. Skrynšot

Dniami Krušynskaja, jakaja 53 hady addała śfiery ŚMI, pajšła na adpačynak. Na ŭračystaści z hetaj nahody hučała šmat pryjemnych słoŭ. Dyrektarka ŭstanovy Natalla Kuźniacova nazvała Krušynskuju «adkaznym i vielmi zasłužanym rabotnikam», jaki «stajaŭ la vytokaŭ» i «padaryŭ siabie» redakcyjna-vydavieckaj ustanovie «Kultura i mastactva».

Načalnica adździeła mižnarodnaha supracoŭnictva i ŭzajemadziejańnia ź ŚMI Ministerstva kultury Viktoryja Ratabylskaja ŭručyła Krušynskaj hanarovuju hramatu ministerstva, a namieśnik dyrektara ŭstanovy Vasil Śvistunoŭ pieradaŭ hanarovuju hramatu ad Biełaruskaha sajuza žurnalistaŭ.

Ludmiła Krušynskaja razam z kalehami. Fota: kultinfa / Telegram

«Za aktyŭny ŭdzieł u realizacyi dziaržaŭnaj infarmacyjnaj palityki» vieteran žurnalistyki atrymała hanarovuju hramatu ad Ministerstva infarmacyi.

Zaŭvažym, što tekst hramat byŭ vykanany na biełaruskaj movie, a voś usie da adnaho vystupy va ŭstanovie, jakaja vypuskaje vydańni pa-biełarusku, hučali na ruskaj movie.

Sama Krušynskaja taksama vystupiła na ruskaj movie i zaklikała svaich užo byłych kaleh «imknucca brać vyšyni» i «dapamahać kiraŭnictvu», a taksama jeździć u kamandziroŭki, a «nie spać na svaich miescach».

Ludmiła Krušynskaja, 13 sakavika 2025 hoda. Fota: kultinfa / Telegram

Kiraŭnictva dziaržaŭnych ŚMI pryznačajecca pa pryncypie łajalnaści kirujučaj asobie, prafiesijnyja jakaści pry hetym časta niavažnyja.

Pieršaja pałasa haziety «Kultura» za 24 studzienia 2025 hoda

Dachodzić da taho, što ŭ biełaruskamoŭnyja vydańni hałoŭnymi redaktarami pryznačajuć ludziej, jakija i nie ŭmiejuć svabodna havaryć pa-biełarusku, i nie imknucca da hetaha. Što i zaśviedčyła cyrymonija provadaŭ na piensiju Ludmiły Krušynskaj.

Kamientary da artykuła