Minkult nalacieŭ z rejdam na niezarehistravany viečar afrykanskaj muzyki
U telehram-kanale Ministerstva kultury źjaviłasia paviedamleńnie ab rejdzie mižviedamasnaj «pracoŭnaj hrupy» ŭ adnu minskuju art-studyju z metaj «ažyćciaŭleńnia analizu dziejnaści». Na toj placoŭcy ŭ toj dzień adbyvaŭsia viečar afrykanskaj muzyki, daviedaŭsia Reform.news.
«Pradstaŭniki Ministerstva kultury, strukturnych padraździaleńniaŭ Minharvykankama, jakija ažyćciaŭlajuć dziaržaŭna-ŭładnyja paŭnamoctvy ŭ śfiery kultury, ekanomiki, handlu i pasłuh, pradstaŭniki orhanaŭ MPZ i inšyja zacikaŭlenyja» pajechali na mierapryjemstva nie prosta tak, a tamu što im nibyta pastupiła infarmacyja pra mahčymaje parušeńni na im zakanadaŭstva. I čakańni spraŭdzilisia:
«U vyniku było ŭstanoŭlena, što pad vyhladam majstar-kłasa biez dazvolnych dakumientaŭ pravodziłasia vystupleńnie kalektyva Yankand band i majstra tanca Asi Žych u prahramie «Pierkusijnaje tancavalnaje pahružeńnie». Taksama rabiłasia aktyŭnaja rekłama ŭ sacyjalnaj sietcy Instagram».
U hety dzień, jak daviedaŭsia Reform.news, adna minskaja art-studyja zaprasiła haściej na viečar afrykanskich tradycyjnych rytmaŭ z udziełam muzyčnaha kalektyvu Yankand band i tancorki Asi Žych. Byŭ prapanavany farmat majstar-kłasa z dalejšym udziełam naviedvalnikaŭ.
«Hety viečar adkryje vam dźviery ŭ dziŭny śviet muzyčnych instrumientaŭ z usich kutkoŭ płaniety. Ad afrykanskich barabanaŭ da tybieckich śpiavajučych čašaŭ, ad hukaŭ dydžerydu da etna-flejtaŭ — kožny instrumient raskaža svaju historyju», — adznačałasia ŭ anonsie mierapryjemstva.
Adnak pavodle ciapierašniaha abnoŭlenaha zakanadaŭstva, vystupleńni lubych kalektyvaŭ pavinny być uzhodnienyja ź dziaržaŭnymi strukturami, navat kali jany tyčacca afrykanskich rytmaŭ. Tamu «ŭ dačynieńni da kiraŭnikoŭ arhanizacyi składzieny pratakoł ab parušeńni zakanadaŭstva ŭ častcy arhanizacyi i praviadzieńnia kulturna-vidoviščnych mierapryjemstvaŭ, a taksama inšych pravaparušeńniach».
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama8
Kamientary