Usie zhubili na abvale rynkaŭ, adzin Bafiet zarabiŭ. U čym sakret?

Na minułym tydni miljardery stracili sotni miljardaŭ dołaraŭ. Akcyi abrynulisia. Iłan Mask, Mark Cukierbierh i Džef Biezas — usie ŭ minusie. Ale adzin čałaviek zdoleŭ umacavać svaje pazicyi. Heta 94-hadovy Uoren Bafiet. Jak tak?

Uoren Bafiet. Fota: Daniel Zuchnik / Getty Images

Pavodle źviestak Bloomberg, z pačatku hoda Iłan Mask pabiadnieŭ na 110 miljardaŭ dołaraŭ, Džef Biezas — na 37,6 miljarda, Mark Cukierbierh — na 18,6 miljarda. Tolki Uoren Bafiet zdoleŭ paźbiehnuć značnych strat: z pačatku hoda jaho kapitał pavialičyŭsia na 23,4 miljarda dołaraŭ.

Na kaniec 2024 hoda, pavodle Wall Street Journal, kampanija Bafieta Berkshire Hathaway trymała na rachunkach i ŭ dziaržaŭnych ablihacyjach ZŠA 321,4 miljarda dołaraŭ — rekordnaja suma. Heta bolš za VUP Finlandyi i amal roŭna VUP Čechii.

Analityki adznačajuć, što taki abjom hrošaj śviedčyć pra aściarožny padychod Bafieta da ciapierašniaj situacyi na rynku.

U svaim štohadovym liście akcyjanieram 22 lutaha 2025 hoda Bafiet padkreśliŭ: niahledziačy na «nadzvyčajnuju» keš-pazicyju, asnoŭnaja častka srodkaŭ usio roŭna znachodzicca ŭ akcyjach.

Na toj momant pahrozy novych mytaŭ ad Donalda Trampa byli tolki słovami. Tolki ŭ sakaviku Bafiet nazvaŭ hetyja miery «ŭ peŭnaj stupieni aktam vajny».

Niahledziačy na heta, jaho pavodziny ŭ 2024 hodzie byli vyraznymi: jon addavaŭ pieravahu zachavańniu kešu, a nie kupli novych akcyj.

«Śviet zasiarodžany na karotkaterminovych vynikach. Ale doŭhaterminovyja rašeńni pracujuć lepš», — kaža Bafiet.

Z 1965 hoda akcyi inviestycyjnaha chołdynhu Berkshire Hathaway raśli ŭ siarednim na 19,9% u hod, u paraŭnańni z 10,4% u asnoŭnaha fondavaha indeksu ZŠA S&P 500, jaki adlustroŭvaje siaredniuju canu 500 najbujniejšych kampanij.

Pa słovach Bafieta, vydatnyja vyniki patrabujuć ciarpieńnia. Časam lohka paddacca dumcy, što inviestar straciŭ chvatku, ale važna nie paddavacca rynkavym nastrojam.

U svaim liście jon zapeŭniŭ: Berkshire nikoli nie budzie addavać pieravahu najaŭnym hrašam abo ich ekvivalentam (naprykład, ablihacyjam), kali jość mahčymaść ukłaścisia ŭ dobry biźnies — navat kali heta častkovaja ŭłasnaść.

Adnačasova Bafiet nie ŭkładajecca ŭ pierahrety rynak. Jon ciarpliva čakaje pa-sapraŭdnamu vyhadnych mahčymaściaŭ. U adroźnieńnie ad inšych miljarderaŭ, jon nie kuplaje toje, što ŭ modzie. Jon kuplaje tolki toje, što stabilnaje i niedaacenienaje.

Jak adznačaje Forbes, fiłasofija Bafieta abapirajecca na idei Biendžamina Hrema: razhladaj akcyju jak biznes, a nie jak ličbu na fondavym rynku, jakaja pastajanna mianiajecca.

Pakul inšyja ŭkładalisia ŭ novyja ličbavyja technałohii i kryptavaluty, Bafiet inviestavaŭ u elektrasietki, strachavyja kampanii i čyhunki. Heta moža vyhladać nianova, ale heta stabilna i prynosić prybytak navat u ciažkija časy.

U toj ža čas Bafiet vybaračna inviestuje za miežami ZŠA. Jašče ŭ 2019 hodzie jon ukłaŭsia ŭ piać japonskich handlovych kampanij. Heta doŭhaterminovaja staŭka na nadziejny i prybytkovy biznes, a nie sproba zarabić na karotkaterminovych śpiekulacyjach.

U liście akcyjanieram Bafiet nahadaŭ: Berkshire amal nie vypłačvaje dyvidendaŭ. Z 1967 hoda — tolki adzin raz. Usie prybytki reinviestujucca ŭ raźvićcio kampanii. I heta daje vynik: u 2024 hodzie rynkavy košt Berkshire pieravysiŭ tryljon dołaraŭ.

«U małym maštabie akcyjaniery ŭdzielničali ŭ «amierykanskim cudzie», admaŭlajučysia ad dyvidendaŭ dziela rostu. Spačatku heta byli kapiejki, ale z časam — miljardy», — piša Bafiet. «Kali my nie spažyvajem, a reinviestujem — heta i jość kapitalizm. Sa svaimi niedachopami, ale z unikalnaj zdolnaściu stvarać ekanamičnyja cudy».

Takim čynam, Uoren Bafiet zarablaje, kali inšyja hublajuć, tamu što nie śpiašajecca, trymaje keš u čakańni lepšych mahčymaściaŭ, układvaje ŭ toje, što razumieje, i vieryć u ciarpieńnie i siłu składanych pracentaŭ.

I heta pracuje: z pačatku 2025 hoda akcyi Berkshire vyraśli na 5,6%, u toj čas jak S&P 500 — tolki na 2,2%.

U mai kampanija apublikuje finansavuju spravazdaču za pieršy kvartał i stanie zrazumieła, ci vykarystaŭ Bafiet častku keša paśla viasnovaha abvału rynku.

Svaim pierajemnikam u Berkshire Hathaway Bafiet vybraŭ małaviadomaha kiraŭnika chiedžfondu z Kaniektykuta Toda Kombsa. Hodnaha kandydata ŭ Berkshire Hathaway šukali bolš za piać hadoŭ.

U adroźnieńnie ad Trampa, Bafiet nie vieryć u kryptavaluty.

«Što da kryptavalut, uvohule, ja mahu skazać dastatkova ŭpeŭniena, što jany drenna skončać. Kali i jak heta zdarycca — ja nie viedaju», — zajaŭlaŭ kiraŭnik inviestfondu Berkshire Hathaway jašče ŭ 2018 hodzie. Bafiet taksama zapeŭniŭ, što nikoli b nie staŭ hulać na fjučersach kryptavalut.

Uoren Bafiet — heta prykład nie tolki talentavitaha finansista, ale i sumlennaha, ścipłaha čałavieka.

Žyvie jon u Omasie, štat Niebraska, ZŠA. Žyvie ŭ tym samym domie, jaki jon nabyŭ za $31 500. Dom znachodzicca ŭ zvyčajnym žyłym rajonie Omachi i staŭ simvałam jaho askietyčnaha stylu žyćcia, niahledziačy na miljardny kapitał.

Dom Uorena Bafieta ŭ Omasie, Niebraska, ZŠA. Fota z sacyjalnych sietak

Choć jon vałodaje vializnymi srodkami, Bafiet nie maje asabistych viłaŭ, jacht ci raskošnych asabniakoŭ.

Za svajo žyćcio jon achviaravaŭ na dabračynnaść bolš za $57 miljardaŭ. U 2024 hodzie jon zrabiŭ najbujniejšaje štohadovaje achviaravańnie, pieradaŭšy akcyi Berkshire Hathaway na sumu $5,3 miljarda piaci dabračynnym fondam, uklučajučy Fond Biła i Mielindy Hiejts. Bolš za toje, Bafiet abaviazaŭsia pieradać na dabračynnaść 99% svajho bahaćcia, i paśla jaho śmierci jaho dzieci buduć adkaznyja za raźmierkavańnie amal $150 miljardaŭ praz dabračynny trast. 

Kamientary da artykuła