Turcyja znajšła ŭ Čornym mory radovišča hazu na 30 miljardaŭ dalaraŭ

Turcyja vyjaviła ŭ Čornym mory novaje radovišča pryrodnaha hazu abjomam 75 miljardaŭ kubamietraŭ, paviedamiŭ prezident Turcyi Redžep Taip Erdahan. Radovišča raźmieščana ŭ rajonie śvidraviny Goktepe-3.

Redžep Taip Erdahan. Fota: Paul Ellis Pool / Getty Images

Pa słovach Erdahana, ekanamičnaja kaštoŭnaść hetaha radovišča składaje 30 miljardaŭ dalaraŭ. Prezident Turcyi adznačyŭ, što novaje adkryćcio zmoža zadavolić patreby ŭsich žyłych damoŭ krainy ŭ pryrodnym hazie na praciahu troch z pałovaj hadoŭ.

Jak piša Reuters, štodzionnaja zdabyča pryrodnaha hazu Turcyjaj na jaje fłahmanskim radoviščy Sakarja ŭ Čornym mory dasiahnuła kala 9,5 miljona kubičnych mietraŭ, pakolki kraina naroščvaje svaje enierhietyčnyja ambicyi jak unutry krainy, tak i za miažoj.

Turcyja, jakaja impartuje bolš za 90% svaich enierhietyčnych patrebaŭ, imkniecca skaracić impart i pavysić biaśpieku pastavak, raźvivajučy ŭnutranyja resursy i pašyrajučy mižnarodnaje partniorstva ŭ raźviedcy nafty i hazu.

Kamientary da artykuła