BIEŁ Ł RUS

Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ

22.05.2025 / 20:5

Nashaniva.com

Chłopcu z Homiela było 24 hady. Adrazu paśla vyzvaleńnia jon prapaŭ. Spačatku kazali, što pajechaŭ u manastyr, ale ŭrešcie Vituchnoŭski znajšoŭsia na froncie — na baku akupantaŭ. Ciapier siabry Alaksandra paviedamili «Našaj Nivie» pra jaho śmierć.

Alaksandr Vituchnoŭski. Fota ź jahonaj staronki Ukantakcie

Alaksandru Vituchnoŭskamu było 24 hady. Jon z Homiela, vučyŭsia tam ža — u Biełaruskim dziaržaŭnym univiersitecie transpartu.

U sacyjalnych sietkach Vituchnoŭski zusim ničoha nie pisaŭ pra palityku. Jon publikavaŭ tam vyrazki z anime, filmaŭ i hulniaŭ, cytaty i miemy.

A voś členy jaho siamji aktyŭna demanstravali svaju palityčnuju pazicyju. Na staroncy ŭ maci — pravasłaŭnyja ikony i zhienieravanyja roliki, na jakich kahości vinšuje Pucin. U baćki — videa kštałtu «Sierbija padtrymała Rasiju». U brata — vialiki čyrvona-zialony ściah i roznyja prarasijskija padpiski.

Adnak navat pry takich siamiejnych uvodnych Vituchnoŭski ŭ Biełarusi trapiŭ u palitviaźni.

Chłopca aryštavali ŭ pačatku 2023 hoda. U kastryčniku 2023 jaho asudzili pa dvuch artykułach — «raspalvańnie varožaści» (č. 1 art. 130 KK) i «ŭdzieł u dziejańniach, što hruba parušajuć hramadski paradak» (č. 1 art. 342 KK). Prysud nieviadomy, ale, pa infarmacyi pravaabaroncaŭ, jon usio ž trapiŭ u kałoniju — jak minimum na niekalki miesiacaŭ.

Alaksandr Vituchnoŭski va ŭniviersitecie. Fota: bsut.by

Vituchnoŭski vyjšaŭ na svabodu ŭviesnu 2024 hoda. Praź miesiac jaho abvieścili ŭ milicejski vyšuk. Pra jaho napisali i pošukavyja atrady, paviedamiŭšy pra prablemy sa zdaroŭjem u chłopca. U kamientarach ludzi paviedamlali, što baćki viedajuć, dzie Alaksandr i što jon «pajechaŭ u manastyr».

Kamientar pad dopisam pra pošuk Alaksandra Vituchnoŭskaha

Manastyr akazaŭsia śpiecyfičny. Staronki Vituchnoŭskaha ŭ sacsietkach nie abnaŭlalisia da 24 listapada 2024. Tady jon vykłaŭ razmytaje fota rasijskaha vajskoŭca. Toje, što vajskoviec mienavita rasijski, vidać pa formie.

Fota, jakoje vykłaŭ Alaksandr Vituchnoŭski

Niadaŭna ŭkrainski prajekt «Chaču žyć» vykłaŭ śpis z bolš za 700 biełarusaŭ, jakija vajujuć suprać Ukrainy. U pieraliku imionaŭ jość i Alaksandr Vituchnoŭski — paviedamlajecca, što jon padpisaŭ kantrakt z rasijskaj armijaj 14 červienia 2024 hoda.

Apošni raz hamialčuk byŭ anłajn 26 listapada 2024 hoda.

U bazie śmierciaŭ hramadzian Biełarusi, dastupnaj «Kibierpartyzanam», Vituchnoŭski jašče paznačany žyvym. Adnak tam ukazvajucca źviestki pa stanie na kaniec 2024 hoda.

Jak stała viadoma «Našaj Nivie», Alaksandr Vituchnoŭski zahinuŭ u pačatku 2025 hoda. Hetaj infarmacyjaj padzialilisia siabry byłoha palitviaźnia.

{DONATE_PAYPAL}

Čytajcie taksama:

Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»

Pamierła 45-hadovaja eks-palitźniavolenaja Tamara Karavaj. Letaś jaje vyzvalili pa pamiłavańni

Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili

Kamientary da artykuła