Krutoha ajcišnika, jaki viarnuŭsia z Polščy, kinuli za kraty za finansavańnie «ekstremizmu»
Siarhiej Sałažencaŭ zajmaŭ vysokija pasady ŭ roznych IT-kampanijach. Paśla viartańnia ŭ Biełaruś jaho aryštavali i ŭžo asudzili pa kryminalnaj spravie.
Alis Games. Siarhiej Sałažencaŭ staić krajni sprava
Siarhieju Sałažencavu 42 hady. Jon naradziŭsia ŭ Hrodnie. Paśla zakančeńnia škoły pastupiŭ na fakultet prykładnoj matematyki i infarmatyki BDU. Z 2005 hoda pracuje ŭ IT.
Spačatku Siarhiej uładkavaŭsia ŭ kampaniju SaM Solutions, dzie daros da pazicyi kiraŭnika kamandy. U 2009-m pierajšoŭ na pazicyju viadučaha raspracoŭščyka ŭ kampaniju Reaxion, jakaja stvarała mabilnyja hulni. U 2011-m staŭ techničnym dyrektaram u nievialikaj Alis Games, jakaja taksama raspracoŭvała hulni dla mabilnych telefonaŭ i sacsietak. Samaja viadomaja hulnia studyi — Need a Hero — atrymała niekalki prestyžnych uznaharod. Paśla paŭtara hoda byŭ starejšym raspracoŭščykam u Viplay.
U kancy 2021 hoda Sałažencaŭ pierajechaŭ u Varšavu. Tam jon adkryŭ IP i ŭładkavaŭsia ŭ kampaniju RunMyLease, dzie zajmaje pasadu Tech lead (čałaviek, jaki adkazvaje za techničnyja rašeńni na prajekcie i techničnaje kiraŭnictva kamandaj). Heta amierykanskaja kampanija, jakaja raspracoŭvaje rašeńni dla prodažu aŭtamabilaŭ i pracuje z dylerskimi centrami.
Hałoŭnaje chobi Siarhieja — balnyja tancy. Jon pačaŭ vystupać parna ŭ Polščy ŭ 2023 hodzie i paŭdzielničaŭ u vaśmi konkursach razam z partniorkaj u katehoryi 40+. U 2024 hodzie jany ŭziali dva zołata i adno srebra na tancavalnych konkursach u Polščy.
Siarhiej Sałažencaŭ (na podyumie na 3 miescy) z partniorkaj na tancavalnym konkursie ŭ Zialonaj Hury ŭ krasaviku 2023 hoda. Fota: powiatowa.info
Paśla Siarhiej viarnuŭsia ŭ Biełaruś. Nieviadoma, kali dakładna heta adbyłosia, ale apošni raz jon staviŭ reakcyju ŭ Linkedin u vieraśni 2024 hoda.
Chutčej za ŭsio, prykładna tady Sałažencaŭ byŭ aryštavany. Jamu vystavili abvinavačvańnie ŭ «finansavańni ekstremisckaj dziejnaści» (art. 361-2 KK). Siarhieju pahražała da 5 hadoŭ chimii albo ad 3 da 5 hadoŭ kałonii.
Praces nad ajcišnikam prachodziŭ u Hrodzienskim abłasnym sudzie. Miarkujučy pa tym, što paśla suda Sałažencaŭ tak i nie źjaviŭsia anłajn, jamu prysudzili termin u kałonii.