Deputaty terminova adobryli štrafy za adsutnaść bulby ŭ kramach

Deputaty Pałaty pradstaŭnikoŭ pryniali ŭ dvuch čytańniach zakonaprajekt, jaki praduhledžvaje adkaznaść za parušeńni ŭ pastaŭkach aharodninnaj pradukcyi dla dziaržaŭnych patreb. 

Fota: vecteezy.com

Deputaty Pałaty pradstaŭnikoŭ pryniali ŭ dvuch čytańniach zakon, jaki ŭnosić źmieny ŭ Kodeks Respubliki Biełaruś ab administracyjnych pravaparušeńniach. Jany datyčacca parušeńniaŭ, źviazanych z pastaŭkaj harodniny i sadaviny dla dziaržaŭnych patreb.

Jak rastłumačyła staršynia Pastajannaj kamisii pa zakanadaŭstvie Maryna Lančeŭskaja, zakon raspracavany na vykanańnie łukašenkaŭskaha ŭkaza №232 «Ab asablivaściach pastaŭki płodaaharodninnaj pradukcyi dla respublikanskich dziaržaŭnych patreb».

Ciapier praduhledžvajecca adkaznaść:

za «niepastaŭku abo niedapastaŭki» płodaaharodninnaj pradukcyi z stabilizacyjnych fondaŭ pa damovie dla dziaržpatreb dla pastaŭščykoŭ;

za adsutnaść takoj pradukcyi ŭ realizacyi ŭ handlovym abjekcie ŭ mižsiezonny pieryjad — dla narychtoŭščykaŭ (handlovaj sietki). 

Za parušeńnie hetych patrabavańniaŭ praduhledžvajecca štraf:

dla fizičnych asob — ad 5 da 12 bazavych vieličyń (210 — 504 rubli);

dla jurydyčnych asob — ad 20 da 200 bazavych vieličyń (840 — 8400 rubloŭ).

Chto budzie sačyć?

Składvać pratakoły zmohuć pradstaŭniki miascovych uładaŭ, Kamiteta dziaržkantrolu i MARH. 

Razhladać spravy — administracyjnyja kamisii i ekanamičnyja sudy.

Lenčeŭskaja adznačyła, što na fonie niadaŭniaha deficytu bulby viasnoj hetaja miera dapamoža zabiaśpiečyć charčovuju biaśpieku i paźbiehnuć deficytu ŭ mižsiezonny pieryjad.

U hetym hodzie adsutnaść bulby ŭ biełaruskich kramach stała top-navinoju ŭ ŚMI, pra heta pisali navat zamiežnyja miedyi.

Kamientary da artykuła