Łukašenka buduje sakretny zavod pa vytvorčaści dronaŭ u Minsku

Jak vyśvietliŭ «Biełpoł», pradpryjemstva pa sieryjnaj vytvorčaści ŭdarnych bieśpiłotnikaŭ patajemna budujecca ŭ Frunzienskim rajonie Minska. Za zavodam, jaki aficyjna buduje pryvatnaja kampanija, stajać struktury, źviazanyja z Šejmanam.

Alaksandru Łukašenku pakazavajuć dron «Miratvorac» na palihonie Abuz-Lasnoŭski pad Baranavičami, 21 kastryčnika 2022 hoda. Fota: «Puł pieršaha»

29 krasavika 2025 hoda Uładzimir Pucin na sustrečy z Łukašenkam abviaściŭ, što Rasija hatova pabudavać u Biełarusi zavod pa vytvorčaści bieśpiłotnikaŭ. Ale, jak śviedčyć novaje rasśledavańnie «Biełpoła», taki zavod užo dziejničaje z 2023 hoda ŭ Frunzienskim rajonie stalicy.

Aficyjna jano maje status pryvatnaha, ale, jak vynikaje z rasśledavańnia, im kirujuć nabližanyja da Łukašenki firmy i słužboŭcy.

Jak raskazvajuć rasśledavalniki, u Biełarusi dziejničaje kanstruktarskaje biuro «Bieśpiłotnyja viertaloty», jakoje śpiecyjalizujecca na raspracoŭcy i vytvorčaści ciažkich bieśpiłotnikaŭ viertalotnaha typu. Z 9 žniŭnia 2024 hoda hetaja kampanija trapiła pad sankcyi ZŠA, a paźniej i inšych krain.

Pradbačačy takoje raźvićcio padziej, ułady vyrašyli stvaryć «dačku» — svojeasablivaha dvajnika asnoŭnaha pradpryjemstva. Heta dazvoliła abyści častku abmiežavańniaŭ i praciahnuć dziejnaść pad inšaj šyldaj.

Tak, u mai 2023 hoda było zarehistravana ZAT «Bieśpiłotnyja latalnyja aparaty» sa statutnym fondam usiaho ŭ 3700 biełaruskich rubloŭ.

U žniŭni 2023 hoda hetaje pradpryjemstva nabyło vytvorčyja pamiaškańni na vulicy Janki Maŭra, 47 płoščaj 16 hiektaraŭ u Minskaha zavoda budaŭničych materyjałaŭ, jaki znachodziŭsia ŭ pracesie likvidacyi. Cana ździełki — usiaho 4,5 młn rubloŭ. Aficyjna prodaž adbyŭsia zhodna z rasparadžeńniem Łukašenki №124-RP ad 9 žniŭnia 2023 hoda z hryfam «dla słužbovaha karystańnia».

Za novym pradpryjemstvam staić struktura «Viektar kapitał hrup» — farmalna pryvatnaja kampanija, jakuju ŭznačalvaje były kiraŭnik Upraŭleńnia spravami Łukašenki Šejman i dva jaho namieśnika — Śvirydaŭ i Sielivanaŭ.

U vypadku ZAT «Bieśpiłotnyja latalnyja aparaty», jak adznačaje «Biełpoł», kožnaja drabiaza abmiarkoŭvałasia na naradach u «Viektar kapitał hrup». Navat takoje pytańnie, jak zdača mietałałomu.

Siarod klučavych fihur, źviazanych z «Bieśpiłotnymi latalnymi aparatami», — Valeryj Japryncaŭ, vieteran biełaruskaha biznesu, jaki niekali byŭ partnioram apalnaha Juryja Čyža. Jak vynikaje z dakumientaŭ, jon prysutničaŭ na naradzie pa raźvićci ZAT «Bieśpiłotnyja latalnyja aparaty» i źjaŭlajecca aficyjnym saŭładalnikam jak biełaruskich, tak i rasijskich kampanij, źviazanych ź bieśpiłotnikami. Adnak, pa źviestkach «Biełpoła», častka hetych kampanij — fiktyŭnyja, ź mizernym štatam i biez realnaj vytvorčaści.

Pavodle vytvorčaha płana pa stanie na kastryčnik 2023 hoda, zavod na toj čas užo zajmaŭsia sieryjnaj vytvorčaściu dvuch typaŭ udarnych BPŁA:

— «Askałon» — reaktyŭny kryłaty bieśpiłotnik z dalnaściu da 310 km (anałah iranskaha Shahed);

— «Miratvorac» — z dalnaściu da 180 km.

Da kanca 2025 hoda pradpryjemstva pavinna vyjści na vytvorčaści da 960 adzinak štohod, abo 2—3 drony štodnia. Kožny ź ich zdolny nieści da 10 kh vybuchoŭki. Prybytak pradpryjemstva aceńvajecca ŭ 76,2 młn dalaraŭ na hod.

I heta nie pratatypy, a zbroja, jakaja ŭžo pastaŭlajecca ŭ Rasiju.

Pry hetym ZAT «Bieśpiłotnyja latalnyja aparaty» pa stanie na červień 2025 hoda nie trapiła ni ŭ adzin sankcyjny śpis, bo farmalna nie źviazana z užo padsankcyjanavanym pradpryjemstvam «Bieśpiłotnyja viertaloty».

Kamientary da artykuła