U spravie «Trajpła» źjaviŭsia novy pavarot

Idzie havorka ab ustanaŭleńni faktu nieadpaviednaści damovy kupli-prodažu doli va ŭstaŭnym fondzie «Trajpła» ŭ pamiery 16,75% u 2015 hodzie. Kali sud zadavolić pazoŭ, sprava moža atrymać davoli niečakany pavarot, piša Office Life.

10 hadoŭ tamu dola ŭ pamiery 33,5% u «Trajple» pierajšła ad Uładzimira Japryncava da dvuch rasijan — Aksienćjeva i Michaiła Mamiašvili. Kožny atrymaŭ pa 16,75%. Pierad hetym Japryncaŭ, sprabujučy zakryć daŭhi syna Kaźbieka, prapanoŭvaŭ jaje kupić svajmu šmathadovamu partnioru pa «Trajple» Juryju Čyžu, ale toj nie staŭ hetaha rabić.

U 2019 hodzie razhladaŭsia pazoŭ Uładzimira Japryncava da Iosifa Aksienćjeva ab pryznańni niesapraŭdnym dahavora kupli-prodažu jaho doli ŭ «Trajple». Japryncaŭ kazaŭ, što padpisvaŭ «abaviazacielstva pa zakładzie doli da vypłaty za košt hetaj ža sumy daŭhoŭ synu», jakoha pryhavaryli da vaśmi hadoŭ pazbaŭleńnia voli za machlarstva. Aksienćjeŭ śćviardžaŭ, što kupiŭ 16,75% «Trajpła» za $70 u suviazi z atrymanaj prapanovaj, a nie ŭ košt doŭhu. Pry hetym, pavodle dadzienych na 2015 hod, usia dola Japryncava (33,5%) aceńvałasia prykładna ŭ $50 młn. Adnak adkazčyk i «Trajpł» nie zmahli padać aryhinał dahavora. Tady sud nie zadavoliŭ pazoŭ.

Zaraz u «Trajple» ličać dahavor nikčemnym u suviazi ź jaho prytvornaściu. Pa mierkavańni kampanii, realnyja namiery bakoŭ byli nie ŭ ździajśnieńni advarotnaj ździełki, a ŭ zabieśpiačeńni viartańnia doŭhu. To bok baki zaklučyli dahavor harantyi. Usie pytańni ŭžo ŭrehulavanyja.

Novy pazoŭ paśledavaŭ paśla taho, jak Iosif Aksienćjeŭ pasprabavaŭ viarnuć doŭh «Trajpła». U materyjałach spravy ab ekanamičnaj žyćciazdolnaści «Trajpła» havaryłasia ab kredytorskaj zapazyčanaści pierad Aksienćjevym u pamiery 18,344 młn rubloŭ. Ale tady hetaja suma nie padlahała ŭklučeńniu ŭ rejestr patrabavańniaŭ kredytoraŭ i pavinna była pahašacca paśla zaviaršeńnia raźlikaŭ z konkursnymi kredytorami. U minułym hodzie «Trajpł» zaviaršyŭ sanacyju i vyjšaŭ z bankructva, a ŭ rasijanina źjaviłasia mahčymaść spahnać hrošy ź biełaruskaj kampanii.

Zaraz dola Juryja Čyža ŭ TAA «Trajpł» składaje 66,5%. Pa 16,75% naležyć Mamiašvili i samomu tavarystvu. Aksienćjeŭ vyjšaŭ z «Trajpła» na fonie ryzyki pryznańnia kampanii bankrutam.

Kali zaraz sud zadavolić pazoŭ, to Uładzimir Japryncaŭ moža viarnucca ŭ skład udzielnikaŭ «Trajpła», i spatrebicca pierahlad šerahu inšych spraŭ.

Sam Japryncaŭ kaža, što na hety momant los jaho doli ŭ «Trajple» jamu nie cikavy. Jon nie choča havaryć ab pravamiernaści ci niepravamiernaści pazoŭnych patrabavańniaŭ, «chaj sud vyniasie abhruntavanaje rašeńnie».

Atrymać kamientar u Iosifa Aksienćjeva i Juryja Čyža pakul nie ŭdałosia.

• 0
• 0
• 0
• 0
• 0
• 0
• 0
• 0