U minskich škołach chočuć pastavić aŭtamaty sa snekami i napojami
Pra namier ustanoŭki ŭ minskich škołach aŭtamataŭ sa snekami i napojami paviedamiła staršynia kamiteta pa adukacyi Minharvykankama Maryna Iljina, piša BiełTA.
Fota ilustracyjnaje
Pa słovach čynoŭnicy, padčas pierapynkaŭ miesca, jakoje najbolš naviedvajecca ŭ škole — bufiet. Adzin pradaviec nie zaŭsiody paśpiavaje absłuhoŭvać usich vučniaŭ, tamu ŭ siaredniaj škole №52 ekśpierymientalna pastavili viendynhavy aŭtamat.
Za miesiac jon zaśviedčyŭ dobry popyt: dzieci mahli kupić sok, piečyva i inšyja dazvolenyja pradukty. U budučyni, kali piłotny prajekt apraŭdaje siabie, aŭtamaty mohuć źjavicca i ŭ inšych navučalnych ustanovach.
Dyrektarka kambinata školnaha charčavańnia Minska Ludmiła Krupskaja adznačyła, što aŭtamat pracavaŭ u škole №52 z 5 vieraśnia. Jon dazvalaje dzieciam i piedahoham nabyć karysny pierakus navat u karotkija pierapynki (10—15 chvilin), kali nie ŭsie paśpiavajuć zajści ŭ bufiet. Aŭtamat pastavili ŭ faje škoły, tamu pierakus možna kupić pierad adkryćciom abo paśla zakryćcia bufieta, a taksama ŭ šosty vučebny dzień, kali stałovyja nie pracujuć.
Aŭtamat prapanuje vafli, ziefir, vadu, sok, a ŭ chutkim časie tam źjavicca i vypiečka. Jon taksama zručny tym, što navat vučni pačatkovych kłasaŭ mohuć lohka ŭbačyć uvieś asartymient. Pa słovach Ludmiły Krupskaj, paśla ustanoŭki aŭtamata pradukcyja bufieta pačała pradavacca lepš.
Čytajcie taksama:
Łukašenka prapanavaŭ šyrej ukaraniać pierapialinyja jajki ŭ školnaje mieniu
Krychu padaražeje charčavańnie ŭ škołach i dziciačych sadkach
U minskich škołach pastaviać aŭtamaty ź ježaj: pieršy ŭžo pracuje