U Ispanii cieła čałavieka znajšli ŭ kvatery praz 15 hadoŭ. Da taho jaho nichto nie šukaŭ

U ispanskaj Valensii miascovaja palicyja 11 kastryčnika znajšła cieła mužčyny, jaki moh pamierci kala 15 hadoŭ tamu. Heta byŭ pažyły čałaviek, jaki žyŭ u svajoj kvatery ŭ zvyčajnym haradskim rajonie Fuensanta, piša El Pais.

Fota ilustracyjnaje

Telefonny vyklik u palicyju i strachavuju kampaniju zrabili susiedzi mužčyny, jakija žyli ŭ hetym domie. Pryčynaj vykliku stała zatoplenaja terasa apošniaha paviercha doma paśla mocnych daždžoŭ. Kali ratavalniki i palicyja pryjšli dla likvidacyi prablemy z kanalizacyjaj, to pry hetaj nahodzie jany i znajšli cieła niabožčyka.

Susiedzi kažuć, što nie bačyli mužčynu doŭhi čas i dumali, što jon znachodzicca ŭ domie dla sastarełych. Kali palicyja ŭvajšła ŭ kvateru, dźviery nie byli ŭzłamanyja, łancužok byŭ zamkniony znutry. Cieła znajšli ŭ adnym z pakojaŭ u vopratcy. Pavodle pieršych viersij śledstva, čałaviek pamior pa naturalnych pryčynach.

Niabožčyk mieŭ dvuch dziaciej — syna i dačku, ź jakimi nie padtrymlivaŭ kantaktaŭ. Taksama jon nie mieŭ suviazi z byłoj žonkaj i inšymi členami siamji na praciahu 35 hadoŭ.

Pakolki nichto nie zajaŭlaŭ pra śmierć mužčyny, sacyjalnyja słužby ŭsie hetyja hady praciahvali pieraličvać jamu piensiju, a kamunalnyja płaciažy ź jahonych rachunkaŭ zdymalisia aŭtamatyčna. Tamu nichto tak doŭha i nie zaŭvažaŭ śmierci samotnaha mužčyny.

Kamientary da artykuła