«Čałaviekam hoda» pa viersii Time stali adrazu vaśmiora «architektaraŭ štučnaha intelektu»

U 2025 hodzie časopis Time adznačyŭ svaim tradycyjnym prestyžnym zvańniem «Čałaviek hoda» nie adnu asobu, a cełuju hrupu — «architektaraŭ štučnaha intelektu». Jak piša vydańnie, mienavita ŠI ciapier staŭ hałoŭnaj siłaj, jakaja źmianiaje śviet: ad miedycyny i navuki da ekanomiki i kultury.

Na vokładkach śpiecyjalnaha vypusku Time raźmiaścili stvaralnikaŭ i kiraŭnikoŭ najbujniejšych kampanij u śfiery štučnaha intelektu: Marka Cukierbierha (Meta), Lizu Su (AMD), Iłana Maska (xAI), Džensena Chuanha (Nvidia), Sema Altmana (OpenAI), Demisa Chasabisa (DeepMind), Darya Amadeja (Anthropic) i Fej-Fej Li (Stenfardski instytut čałaviekacentryčnaha ŠI i World Labs).

Time adznačaje, što ŭ 2025 hodzie štučny intelekt adnačasova i ŭražvaŭ, i vyklikaŭ tryvohu. Technałohii vučylisia vyrašać zadačy, jakija raniej ličylisia amal nierealnymi: naprykład, ekśpierymienty pa kamunikacyi z kitami abo rašeńnie matematyčnaj prablemy, jakaja zastavałasia adkrytaj 30 hadoŭ.

Časopis padkreślivaje: jak by ni staviłasia pytańnie, adkazam usio čaściej stanovicca štučny intelekt.

Mienavita ludzi, jakija stvarajuć hetyja sistemy, u značnaj stupieni sfarmiravali technałahičny paradak dnia hoda i źmianili bačańnie budučyni.

U 2024 hodzie «Čałaviekam hoda» staŭ prezident ZŠA Donald Tramp paśla pieramohi na vybarach u ZŠA. Raniejšy śpis łaŭreataŭ taksama ŭklučaje śpiavačku Tejłar Śvift (2023), prezidenta Ukrainy Uładzimira Zialenskaha (2022) i miljardera Iłana Maska (2021).

Kamientary da artykuła