Pieršaja kraina śvietu zabaraniaje sacsietki dla dziaciej va ŭzroście da 16 hadoŭ. Jak heta budzie pracavać

Urad zajaŭlaje, što heta zabarona nakiravanaja na źnižeńnie cisku i ryzyk, jakim mohuć padviarhacca dzieci ŭ sacyjalnych sietkach. Heta pieršaja ŭ śviecie padobnaja palityka, jakaja maje vialikuju padtrymku siarod mnohich baćkoŭ.

Daśledavańnie, zakazanaje ŭradam na pačatku hetaha hoda, pakazała, što 96% dziaciej va ŭzroście ad 10 da 15 hadoŭ karystajucca sacyjalnymi sietkami.

Pry hetym siem ź dziesiaci padletkaŭ sutykalisia sa škodnym kantentam i niebiaśpiečnymi pavodzinami. Siudy ŭvajšli materyjały mizahinnaha źmiestu, videazapisy bojki, a taksama kantent, jaki zaachvočvaje da parušeńniaŭ charčovych pavodzinaŭ i samahubstva.

Adzin ź siami apytanych taksama paviedamiŭ pra sproby hruminhu (manipulacyja, maskiroŭka ahresii za kłopatam) z boku darosłych abo starejšych dziaciej, a bolš za pałovu nazvali siabie achviarami kibierbulinhu.

Pra jakija sacsietki idzie havorka

Urad Aŭstralii nazvaŭ dziesiać płatformaŭ, jakija buduć uklučany ŭ zabaronu: Facebook, Instagram, Snapchat, Threads, TikTok, X, YouTube, Reddit, a taksama stryminhavyja płatformy Kick i Twitch.

Urad taksama znachodzicca pad ciskam adnosna pašyreńnia hetaj zabarony na anłajn-hulni. Bajučysia, što jany mohuć stać cellu, hulniavyja płatformy, takija jak Roblox i Discord, niadaŭna ŭviali pravierku ŭzrostu dla niekatorych funkcyj, što, vidavočna, źjaŭlajecca sprobaj paźbiehnuć zabarony.

Urad zajaŭlaje, što praciahnie pierahlad śpisu płatformaŭ, da jakich adnosicca zabarona, i pry hetym budzie razhladać try asnoŭnyja kryteryi. Urad zaachvočvaje płatformy vykarystoŭvać niekalki roznych mietadaŭ. Jon taksama zajaŭlaje, što płatformy nie mohuć spadziavacca na samastojnaje dekłaravańnie karystalnikami svajho ŭzrostu abo na paćvierdžańnie ŭzrostu dziaciej baćkami.

Kampanija Meta, jakaja vałodaje Facebook, Instagram i Threads, abviaściła, što pačnie zakryćcio padletkavych akaŭntaŭ z 4 śniežnia. U kampanii zajaŭlajuć, što tyja, kaho vypadkova vydalać, zmohuć vykarystoŭvać dziaržaŭnaje paśviedčańnie asoby (ID) abo padać videasełfi dla paćvierdžańnia svajho ŭzrostu.

Inšyja płatformy, da jakich adnosicca zabarona, pakul nie paviedamili, jak mienavita jany buduć jaje vykonvać. Krytyki śćviardžajuć, što hetaja zabarona, navat kali jaje naležnym čynam realizavać, na samaj spravie nie źmienšyć onłajn-škodu dla dziaciej. Da jaje nie ŭklučany sajty znajomstvaŭ i hulniavyja płatformy, a taksama čat-boty sa štučnym intelektam, jakija niadaŭna trapili ŭ zahałoŭki navin praź nibyta zaachvočvańnie dziaciej da samahubstva i «sapraŭdnyja» razmovy ź niepaŭnaletnimi.

Inšyja adznačajuć, što padletki, jakija spadziajucca na sacyjalnyja miedyja dla znosin i stvareńnia supolnaści, zastanucca izalavanymi, i śćviardžajuć, što navučańnie dziaciej, jak aryjentavacca ŭ sacyjalnych sietkach, było b bolš efiektyŭnym.

Ministr suviazi Anika Uełs pryznała, što zabarona moža być nie «idealnaj».

«Heta budzie vyhladać krychu niazhrabna na praciahu ŭsiaho pracesu, — skazała jana na pačatku listapada. — Vialikija reformy zaŭsiody takimi jość».

Krytyki taksama vykazali zaniepakojenaść nakont maštabnaha zboru i zachavańnia dadzienych, jakija buduć nieabchodnyja, a taksama mahčymym niapravilnym ich vykarystańniem, pakolki płatformy buduć imknucca pravieryć uzrost karystalnikaŭ.

Jak adreahavali kampanii sacyjalnych sietak?

Kampanii, što pracujuć u śfiery sacyjalnych miedyja, byli ŭražanyja abviaščeńniem pra zabaronu ŭ listapadzie 2024 hoda. Jany śćviardžali, što heta budzie składana realizavać, lohka abyści i zojmie šmat času dla karystalnikaŭ, a taksama stvaryć ryzyki dla ich kanfidencyjnaści.

Jany taksama mierkavali, što heta moža vyciaśnić dziaciej u «ciomnyja kutki» internetu i pazbavić moładź sacyjalnych kantaktaŭ. Snap — ułaśnik Snapchat — i YouTube taksama asprečvali, što jany źjaŭlajucca kampanijami sacyjalnych miedyja.

• 17
• 1
• 0
• 1
• 0
• 0
• 2
• 0