Bura nad krainaj

Bura 9 žniŭnia była takoje siły, što ŭpieršyniu za piać hadoŭ pierarvałasia tranślacyja Biełaruskaha telebačańnia. U vyniku avaryj na linijach elektrapieradačy byŭ abiastočany budynak na Kamunistyčnaj, 6. 68 razdušanych aŭtamabilaŭ u adnym Miensku! Bieź śviatła siadzieła čverć krainy. Ale pa zahadzie prezydenta ŭrahan budzie kančatkova pieramožany da viečaru čaćviarha.

Śviatło elektryčnaj lampački nabyło čyrvanavataje adcieńnie, ściamnieła i ŭrešcie zhasła. Čornyja abrysy navakolnych šmatpaviarchovak ledź prastupili na tle nieba, pa jakim, niby zvarjaciełyja, nieślisia nizkija chmary. Raptam praz vyćcio vietru daniośsia rypučy huk — adno z drevaŭ chrusnuła i pačało imkliva chilicca da ziamli, skryhočučy halinami ab balkony. Zapiščeli tarmazy mašyny, jakoj jano zaharadziła darohu. Hetkuju karcinu možna było nazirać u dvary adnaho z damoŭ pa vulicy Pulichava. Štości padobnaje adbyvałasia pa ŭsim Miensku, pa ŭsioj krainie.

«Moža, revalucyja pačałasia?» — mižvoli dumałasia pry vyhladzie adklučanych telekanałaŭ. U dadatak da hetaha, u radyjoprymačy dziela pieraškodaŭ upeŭniena łaviłasia adno «Aŭtaradyjo», pa jakim ceły viečar uparta krucili «N.R.M.». Adnak «radyjokropka», jakaja, jak viadoma, nie zaležyć ad nijakich kataklizamaŭ uklučna ź pierabojami z elektryčnaściu, upeŭniena viaščała pra štarmavoje papiaredžańnie.

U noč z aŭtorka na sieradu «adrubiła» pałovu Miensku, a taksama 4 tysiačy haradoŭ, miastečkaŭ dy viosak pa ŭsioj Biełarusi. Bieź śviatła siadzieła čverć krainy. Cikava, što vokny ŭ «deputackim» domie na vulicy Łodačnaj zapalilisia našmat raniej za navakolnyja damy, a padača śviatła ŭ Litoŭskaje pasolstva nie pierapyniałasia navat tady, kali vulica Zacharava patanała ŭ ciemry.

Ranicaj u sieradu Miensk vyhladaŭ, niby paśla šabasu viadźmarak. Dvary zavalenyja drevami i zasypanyja viećciem. Darohi — taksama vidovišča nie dla słabych na nervy. Na Partyzanskim praspekcie kiroŭca «holfu» nia spraviŭsia z kiravańniem, vylacieŭ na ŭzbočynu dy prosta raścisnuŭsia ŭ dreva. Na vulicy Kazłova zialony «BMV» razłamaŭ lipu, jak zapałku, napałam. Milicyjant i ŭładalnik mašyny składajuć pratakoł: aŭto skrali dy haniali pa horadzie, pakul stychija nia ŭniesła svaich karektyvaŭ u maršrut zhonščykaŭ.

U hetuju noč nia šenciła nia tolki aŭtamabilistam, ale i tym, chto pryncypova nie siadaje za rul. U aeraporcie zatrymali vylety rejsaŭ na Varšavu dy Paryž. Što da ciahnikoŭ, dyk drevy padali paŭsiul, i sastavy zatrymlivali va ŭsich kirunkach, najčaściej — na maskoŭskim. Čatyry klijenty firmy «Tuson-Vajaž» z pryčyny ŭrahanu patrapiać u Ehipiet z spaźnieńniem, kali, viadoma, ichny adpačynak uvohule nie sarviecca. Sprava ŭ tym, što jany nabyli avijabilety na vylet u Šarm-el-Šejch z Maskvy, ale ciahnik vypraviŭsia ŭ šlach našmat paźniej. «Nia dumajcie, što my ŭ nosie kałupajemsia, — adkazali «NN» u kampanii «Tuson-Vajaž». — My ŭžo telefanavali hieneralnamu dyrektaru rasiejskaj avijakampanii «VIM-Avija» z prośbaj adkłaści vylet. Ale heta zrobiać tolki tady, kali budzie chacia b 10 čałaviek, jakija spaźnilisia». Supracoŭniki firmy abtelefanoŭvajuć kalehaŭ, šukajučy inšych turystaŭ, jakija trapilisia ŭ takuju ž sytuacyju, kab naskreści tych 10 čałaviek. Kali klijenty firmy nie paśpiejuć na vylet, dyk musiać za svaje hrošy nabyvać kvitki na samalot da Ehiptu — rasiejskaja kampanija, jakaja pradaje tyja tury, patrabuje ad klijentaŭ «štraf» u pamiery 100% koštu nieskarystanaj pucioŭki. Ale ž i vylecieć u Ehipiet samatuham składana: usie bilety na bližejšyja dni pradadzienyja.

Jakoj lohikaj karystajecca viecier, skazać ciažka. Šmat drevaŭ pavaliła ŭ dvarach, a ŭ parku Horkaha vydziertyja ź ziamli kamli nie adrazu j adšukaješ.

Pavodle aficyjnych źviestak, u krainie razburanyja 50 damoŭ, paškodžanyja kala 200 transfarmatarnych padstancyjaŭ i bolš za 500 km linijaŭ elektrapieradačy. U nasielenych punktach upała nia mienš za 1500 vialikich drevaŭ. Samy trahičny vypadak zdaryŭsia kala vioski Krasnapolle na Rasonščynie: apoŭnačy tam zabiła sasnoju hramadzianina Rasiei, jaki chavaŭsia ŭ namiocie.

Prezydent pastaviŭ zadaču spravicca z nastupstvami stychii ŭžo da viečaru ŭ čaćvier. Pracy pa rasčystcy zavałaŭ zbolšaha pačalisia, ale asablivaha aŭrału nie nazirajecca. Aperatyŭna kamunalnyja słužby paščyravali ŭ rajonie vulicy Jakuboŭskaha, dzie kampaktna pražyvajuć ludzi z pasłablenym zrokam, dla jakich pavalenyja drevy składajuć surjoznuju pieraškodu na zvykłym šlachu na pracu. Rezać pavalenyja drevy tam skončyli ŭžo ŭ sieradu z ranicy. A voś dreva, jakoje pavaliłasia na Respublikanskuju pedahahičnuju biblijateku, vybiŭšy niekalki šybaŭ, uranku prybirać nichto nie śpiašaŭsia.

«Nivodzin čałaviek u hetyja dni nie pavinien skazać, što jon nia budzie rabić tuju ci inšuju pracu», — zajaviŭ Alaksandar Łukašenka. Miž tym, ranicaj u sieradu BRSMaŭcy-pikietoŭščyki la polskaha pasolstva, jak zaŭsiody, piłavali nikomu nie patrebnaje bierviano, u toj čas jak navokał lažali pavalenyja drevy, jakija nichto nie prybiraŭ. Niejak nie pa-cimuraŭsku vyjšła.

• 0
• 0
• 0
• 0
• 0
• 0
• 0
• 0