Śpiecdakładčyk pa Biełarusi rekamienduje biełaruskim uładam nieadkładna i biez usialakich umoŭ vyzvalić palitviaźniaŭ

Biełaruskim uładam rekamiendavana nieadkładna i biez usialakich umoŭ vyzvalić z turmaŭ usich palityčnych apanientaŭ, pravaabaroncaŭ i aktyvistaŭ. Pra heta havorycca ŭ spravazdačy, jakuju padaŭ dla aznajamleńnia Radzie AAN pa pravach čałavieka śpiecdakładčyk pa situacyi ŭ Biełarusi Mikłaš Charašci.

Dakład płanujecca razhledzieć na 23-j siesii rady, jakaja projdzie z 27 maja pa 14 červienia ŭ Ženievie.

Charašci adznačaje, što situacyja z palitźniavolenymi vyklikaje hłyboki niespakoj. «Umovy ich utrymańnia ŭ turmach razam sa źjaŭleńniem infarmacyi ab psichałahičnym i fizičnym nacisku mohuć być rascenieny jak nienaležnaje ŭtrymańnie, a časam i katavańni», — havorycca ŭ dakładzie.

Uradu Biełarusi rekamiendavana pryniać miery dla ŭstaranieńnia ŭsich pieraškod, jakija zaminajuć aktyŭnamu ŭdziełu hramadskich niaŭradavych arhanizacyj i apazicyjnych partyj u palityčnym žyćci krainy, a taksama harantavać biesstarońniaje prymianieńnie zakonaŭ na praktycy.

Akramia hetaha, aficyjnamu Minsku rekamiendavana aktyvizavać pracu parłamienckaj hrupy pa vyvučeńni pytańnia śmiarotnaj kary,

Uładam rekamiendujecca taksama pravieści rasśledavańnie vypadkaŭ hvałtoŭnaha źniknieńnia niekalkich biełaruskich palitykaŭ i žurnalista (majucca na ŭvazie źniknieńni Juryja Zacharanki, Viktara Hančara, Anatola Krasoŭskaha i Dźmitryja Zavadskaha),

Śpiecdakładčyk zaklikaje ŭłady harantavać, što ŭsie zatrymanyja hramadzianie buduć chutka infarmavacca ab pryčynach svajho zatrymańnia i abvinavačańniach, a taksama mieć bieśpieraškodny dostup da advakata. Pry hetym rekamiendavana harantavać absalutnuju zabaronu na katavańni i inšyja vidy nienaležnaha abychodžańnia z zatrymanymi.

U dakładzie ŭtrymlivajecca rekamiendacyja pierahledzieć i pryniać takoje zakanadaŭstva, jakoje «budzie abaraniać mirnyja schody, u tym liku spantannyja akcyi».

Biełaruskim uładam taksama rekamiendavana zabiaśpiečyć abaronu pravaabaroncaŭ i žurnalistaŭ ad pieraśledu, zapałochvańnia i nasilla, pravieści poŭnaje i biesstarońniaje rasśledavańnie ŭsich padobnych vypadkaŭ.

Charašci źviartaje ŭvahu Rady AAN pa pravach čałavieka na toje, što tak i nie atrymaŭ mahčymaść naviedać Biełaruś dla aznajamleńnia ź situacyjaj na miescy, bo biełaruskija ŭłady admovilisia supracoŭničać ź im. Pry padrychtoŭcy dakumienta, paviedamlaje śpiecdakładčyk, u jaho adbylisia sustrečy za miežami Biełarusi z pradstaŭnikami apazicyjnych partyj, hramadskich arhanizacyj, pravaabaroncami, žurnalistami.

• 0
• 0
• 0
• 0
• 0
• 0
• 0
• 0