Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju

Rasijskija śpiecsłužby stvaryli novuju aŭtanomnuju strukturu dla likvidacyi palityčnych apanientaŭ i praviadzieńnia dyviersij za miažoj — Centr 795. Z padrabiaznaściami znajomić rasśledavańnie The Insider.

Paśla pačatku poŭnamaštabnaha ŭvarvańnia va Ukrainu rasijskija ŭłady pačali masava i sistemna vykarystoŭvać dyviersii i zamachi za miažoj. Pakolki raniejšyja struktury raźviedki, u pryvatnaści padraździaleńnie hienierała Andreja Aviarjanava (v/č 29155), byli surjozna skampramietavanyja paśla šerahu pravałaŭ i deananimizacyi aficeraŭ u suśvietnaj presie, uźnikła patreba ŭ novych resursach.

Tak u śniežni 2022 hoda pa rašeńni Hienštaba RF uźnik Centr 795 (v/č 75127). Hetaja zvyšsakretnaja i aŭtanomnaja struktura zadumvałasia jak bolš zakrytaja alternatyva hrupam HRU dla vykanańnia najbolš adkaznych zadač, u tym liku palityčnych zabojstvaŭ i vykradańniaŭ, ale bieź sistemnych pamyłak i «zaśviečanych» kadraŭ minułaha.

Jak vyśvietliŭ The Insider, da červienia 2023 hoda padraździaleńnie było amal całkam ukamplektavana. Farmalna «Centr 795» padparadkoŭvajecca niepasredna načalniku Hienštaba Valeryju Hierasimavu, ale kaściak składajuć vychadcy z Centra śpiecyjalnaha pryznačeńnia FSB (hrupy «Alfa» i «Vympieł»).

Bazaj dla centra staŭ park «Patryjot» u Kubincy, a finansavuju padtrymku zabiaśpiečyli kiraŭnik «Rastecha» Siarhiej Čemiezaŭ i saŭładalnik «Kałašnikava» Andrej Bokaraŭ. Heta dazvoliła płacić aficeram vielmi vysokija zarobki. Tak načalnik upraŭleńnia atrymlivaje ŭ miesiac kala 5400 dalaraŭ tolki ad «Kałašnikava», a jość jašče zarobak ad Ministerstva abarony. Zarobki siłavikoŭ u Biełarusi ŭ razy mienšyja.

Struktura Centra 795 uražvaje svajoj maštabnaściu. Usiaho ŭ im słužyć kala 500 aficeraŭ, jakija raźmierkavany na try ŭpraŭleńni: raźviedvalnaje, šturmavoje i bajavoha zabieśpiačeńnia.

Raźviedvalnaje ŭpraŭleńnie ŭklučaje dzieviać adździełaŭ: ad manitorynhu sacsietak i pierachopu spadarožnikavaj suviazi da ahienturnych sietak za miažoj (12‑y adździeł) i snajpierskich hrup (19‑y adździeł), pryznačanych mienavita dla adrasnych likvidacyj. Šturmavoje ŭpraŭleńnie składajecca z aŭtanomnych udarnych hrup, jakija nie viedajuć pra isnavańnie adna adnoj, što harantuje žyvučaść usioj sietki pry pravale adnoj jačejki. Treciaje ŭpraŭleńnie zabiaśpiečvaje bajavuju padtrymku i maje na ŭzbrajeńni navat najnoŭšyja tanki T-90A i reaktyŭnyja sistemy «Śmierč».

Pavialičyć

Asablivaje miesca ŭ kiraŭnictvie hetaj sakretnaj struktury zajmajuć vychadcy ź Biełarusi. Načalnik štaba Centra 795 Dźmitryj Drazdoŭ i načalnik raźviedvalnaha ŭpraŭleńnia Siarhiej Radkievič źjaŭlajucca vieteranami hrupy «Alfa» KDB Biełarusi.

Ich pryciahnieńnie ŭ rasijskuju śpiecsłužbu, miarkujuć rasśledvalniki, było naŭmysnym krokam: aficery z sajuznaj krainy nie majuć rasijskaj instytucyjnaj bijahrafii, što dazvalaje im lahčej paźbiahać uvahi zamiežnaj kontrraźviedki.

U strukturu padraździaleńnia abodva byli ŭviedzieny praz cyvilnyja pasady ŭ AT «Kałašnikaŭ», što dapamahło schavać ich suviaź z rasijskimi vajskoŭcami i aficyjnymi śpiecsłužbami. Radkievič razam sa svaim namieśnikam Alaksiejem Ilušynym kuryruje najbolš zakrytyja adździeły, jakija zajmajucca ahienturnymi sietkami za miažoj.

Jak Google Translate spaliŭ ahienta

Jak adznačajuć rasśledavalniki, niahledziačy na vysoki ŭzrovień sakretnaści i techničnaje zabieśpiačeńnie, padraździaleńnie sutyknułasia z hučnym pravałam adnaho sa svaich klučavych vykanaŭcaŭ — 42‑hadovaha Dzianisa Alimava.

Jaho karjera pačałasia ŭ staŭrapolskim AMAPie, a praciahnułasia ŭ maskoŭskaj «Alfie» FSB. Alimaŭ mieŭ suviazi na samym vysokim uzroŭni, u tym liku asabista z Ramzanam Kadyravym, jakomu ŭ 2023 hodzie dapamahaŭ šukać źnikłaha plamieńnika. U składzie Centra 795 Alimaŭ zajmaŭsia «čačenskim kirunkam». Adnym ź jaho zadańniaŭ było vykradańnie krytykaŭ režymu ŭ Jeŭropie.

Dla praviadzieńnia apieracyj na terytoryi Zachadu Alimavu patrabavaŭsia ahient. Im staŭ Darka Duravič, jaki žyŭ u Złučanych Štatach. U kastryčniku 2024 hoda ŭ restaranie kala Łubianki Alimaŭ pieradaŭ jamu 60 tysiač dalaraŭ avansu i paabiacaŭ pa 1,5 miljona dalaraŭ za kožnuju paśpiachova «departavanuju» cel. Asnoŭnymi achviarami pavinny byli stać členy siamji emihranta z Čačni Achmieda Zakajeva, jaki pražyvaje ŭ Vialikabrytanii.

Adnak apieracyja pravaliłasia. Aficer Dzianis Alimaŭ vałodaŭ tolki ruskaj movaj. Jaho asnoŭny ahient Darka Duravič razmaŭlaŭ na sierbacharvackaj i anhlijskaj. Kab pieradavać apieratyŭnyja instrukcyi i atrymlivać spravazdačy, jany vykarystoŭvali anłajn-servis Google Translate.

Pakolki servis naležyć amierykanskaj kampanii, FBR pa sudovym ordary atrymała dostup da ŭsich łohaŭ pierapiski. Amierykanskija śpiecsłužby ŭ režymie realnaha času nazirali, jak Duravič vysočvaŭ cel na «biełaj vile kala mora» ŭ Jeŭropie i šukaŭ u internecie pistalety Glock.

Dzianis Alimaŭ byŭ zatrymany 24 lutaha ŭ aeraporcie Bahaty (Kałumbija). Jon prybyŭ tudy rejsam Turkish Airlines sa Stambuła, vykarystoŭvajučy standartnaje apieratyŭnaje prykryćcio — vobraz turysta z brońniu ŭ hateli ŭ Kartachienie. Zatrymańnie stała vynikam sumiesnaj pracy Interpała i amierykanskich śpiecsłužbaŭ. Alimavu pradjaŭleny abvinavačańni ŭ zmovie z metaj zabojstva i padtrymcy teraryzmu, jamu pahražaje pažyćciovaje źniavoleńnie ŭ ZŠA

Pavodle źviestak The Insider, Centr 795 užo arhanizavaŭ šerah zamachaŭ i dyviersij, jakija jašče rasśledujucca. Vydańnie abiacaje raspavieści pra ich paźniej. Adnak užo samo vykryćcio struktury i dziejnaści hetaha padraździaleńnia stvaraje surjoznyja prablemy dla rasijskich śpiecsłužbaŭ, asabliva ŭ suviazi ź pieršym aryštam jaho supracoŭnika. Faktyčna, taki pravał stavić na dziejnaści struktury kryž.

• 30
• 0
• 13
• 5
• 3
• 0
• 7
• 2