BRSM i adździeł pa spravach moładzi Mienharvykankamu raspracoŭvajuć prajekt «pa vychavańni hramadzianskaj samaśviadomaści moładzi» stalicy.
Jak paviedamiŭ na pres‑kanfierencyi 29 žniŭnia pieršy sakratar Minskaha harkama BRSM Vadzim Hihin, prajekt nakiravany na bolš aktyŭny ŭdzieł moładzi ŭ rabocie orhanaŭ miascovaj ułady. Prajekt, u pryvatnaści, praduhledžvaje stvareńnie «maładziožnych kabinietaŭ» pa roznych kirunkach dziejnaści Minharvykankama: sacyjalnaja śfiera, finansavaja i padatkovaja dziejnaść, budaŭnictva, ekanomika i niekatoryja inšyja. «Maładziožnyja kabiniety» buduć farmavacca z členaŭ BRSM, jakija prajšli śpiecyjalny adbor. Płanujecca, što da znajomstva ź dziejnaściu orhanaŭ ułady jany projduć navučańnie ŭ śpiecyjalnych maładziožnych łahierach.
Pavodle słoŭ V.Hihina, meta prajekta — paznajomić maładych ludziej «z funkcyjanavańniem dziaržaŭnaha miechanizmu i zadačami, jakija stajać pierad horadam». Akramia taho, va ŭdzielnikaŭ prajekta źjavicca mahčymaść vyłučyć svaje prapanovy pa tych ci inšych kirunkach. U ramkach prajekta taksama płanujecca stvareńnie novych sajtaŭ, praviadzieńnie ekskursij i majstar‑kłasaŭ u dziaržstrukturach Biełarusi, paviedamiŭ Hihin.
«Pa vialikim rachunku, i miascovuju ŭładu treba nablizić da moładzi i moładź — da miascovaj ułady, kab čynoŭnik mieŭ stanoŭčy imidž u vačach maładoha čałavieka», — zajaviŭ jon.
V.Hihin taksama zaznačyŭ, što meta liderskich prahram BRSM šyrejšaja, čym prosta vypracoŭka liderskich jakaściej. Lider, pavodle jaho słoŭ, pavinien «razumieć tyja zadačy, jakija stajać pierad respublikaj u cełym, pierad horadam, i być prapahandystam siarod svaich adnahodkaŭ i kaleh».
Płanujecca, što realizacyja prajekta pačniecca ŭ kancy vieraśnia i zavieršycca ŭ červieni 2008 hoda.
Siarod inšych najbližejšych płanaŭ BRSM V.Hihin adznačyŭ «aktyŭny pošuk novych form raboty» i «pazbaŭleńnie ad farmalizmu i biurakratyzmu», dziejnaść pa raźvićci sistemy maładziožnych łahieraŭ i atradaŭ achovy pravaparadku, praviadzieńni adukacyjnych sieminaraŭ, vyrašeńni prablemy pracaŭładkavańnia moładzi va ŭzroście ad 14 da 18 hadoŭ.
Pavodle źviestak V.Hihina, ciapier členami BRSM źjaŭlajucca 420 tys. čałaviek. Minskaja haradskaja arhanizacyja abjadnoŭvaje 90 tys. maładych ludziej va ŭzroście ad 14 da 31 hoda, u stalicy dziejničaje bolš za 1.100 piarvičnych arhanizacyj BRSM.
Kamientary