Na pasadu Ulki Pulki znajšli novuju dziaŭčynu. Minułaja syšła praz kanflikt
«Kab vy tolki viedali, što adbyvajecca tam», — raniej kazała pra łejbł «Fłahman Mjuzik», źviazany z Hannaj Siałuk, błohierka-miljońnik Uljana Stalarova, jakaja i stvaryła vobraz Ulki Pulki z nula.
U sacyjalnych sietkach Ulki Pulki ŭčora źjavilisia fotazdymki novaj błohierki, jakaja budzie vystupać pad hetym psieŭdanimam. Napisana, što pačynajecca novaja historyja. Sapraŭdnaja stvaralnica piersanaža Uljana Stalarova faktyčna zastałasia ni z čym.
Svaju praŭdu dziaŭčyna raniej raspaviadała na svaim novym YouTube-kanale. Zajmacca błohinham Uljana pačała jašče kali vučyłasia ŭ škole — heta było ŭ 2015 hodzie. Prahladaŭ amal nie było, ale Uljana vieryła, što niekali ŭsio atrymajecca.
U 16 hadoŭ dziaŭčyna napisała pieršuju pieśniu «Malčik, sorry», a na letnich kanikułach raspracavała pakrokavy płan, jak i što płanuje rabić dalej. Kaža, što razumieła: pieśnia nie stanie chitom, ale pierakulić žyćcio vykanaŭcy.
Tak i atrymałasia. Uljana znajšła padtancoŭku, zrabiła kaściumy i pajšła ź pieršaj pieśniaj vystupać pa roznych mierapryjemstvach dla moładzi. Tam paznajomiłasia z bolš papularnymi błohierami, jaki prapanavali pazdymacca razam.
Biaskoncy drajv, novyja pieśni, zdymki na vulicach, padpisčyki… Usio zakruciłasia tak chutka, što ŭsiaho praz paŭhoda ŭ Ulki Pulki byŭ pieršy solny kancert u Minsku. Jana z honaram zhadvaje, što heta adbyłosia 14 lutaha 2023 hoda — atrymałasia pradać usie kvitki.
A dalej byli zdymki klipaŭ, hastroli (razam ź Dzim Dzimyčam i Andžylišaj Uljana abjeździła ŭsiu Rasiju dy Kazachstan)… Pracavała Ulka Pulka z «Fłahman mjuzik» — muzyčnaj kampanijaj, jakaja ciesna źviazanaja ź niaviestkaj Łukašenki Hannaj Siałuk.
Ulku Pulku razam ź inšymi błohierami kampanii aktyŭna vykarystoŭvali dla prałukašenkaŭskaj prapahandy siarod školnikaŭ. U 2024 hodzie błohierka razam ź inšym kumiram dziaciej Dzim Dzimyčam pakazalna sprabavała stać siabroŭkaj partyi «Biełaja Ruś» — ale atrymała admovu.
U jaki momant pačałosia supracoŭnictva i čamu adbyŭsia kanflikt, Uljana raspaviadać nie choča. Tumanna kaža, što prosta vyrasła z hetaj roli. Ale pryznajecca, što ŭ niejki momant joj było supier-niekamfortna — jana złamałasia i zhubiłasia. Ale ŭ vyniku zrazumieła, što choča čahości bolšaha.
Nie biez škadavańnia Uljana raskazvaje, što zastałasia biez usiaho. «Fłahman mjuzik» zabraŭ i tvorčy psieŭdanim, i ŭsie pieśni, i sacsietki dziaŭčyny.
A płakać tut jość ab čym: na YouTube-kanał «Ulka Pulka» padpisana bolš za 3 miljony čałaviek, jość jašče amal 545 tysiač padpisčykaŭ u tyktoku i kala 13 tysiač padpisčykaŭ u instahramie. Ciapier usio heta atrymała ŭ spadčynu inšaja dziaŭčyna.
Uljana Stalarova sprabuje nie hublać aptymizmu. Jana pačała vystupać pad svaim sapraŭdnym proźviščam. Ale pośpiechi pakul ścipłyja. Na jaje novy YouTube-kanał padpisana krychu bolš za 17 tysiač padpisčykaŭ, a novy klip «Nie ihruška» nabraŭ usiaho 672 prahlady za 3 miesiacy.
Pa šlachu Uljany pajšła i inšaja błohierka «Fłahman mjuzik» — Andžyliša (sapraŭdnaje imia — Anhielina Michalova). Taja sioleta ŭ studzieni zapisała videa, u jakim płača, raspaviadajučy pra kanflikt z łejbłam.
Novaja Ulka Pulka — 15‑hadovaja minskaja školnica ź siamji vajskoŭcaŭ Aryna Ramanava, piša «Lusterka».
Siostry Hruździevy dramatyčna raskazali, jak ich vykinuŭ za dźviery ministr kultury Rusłan Čarniecki. «Jak sabak»
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy
Dla Łukašenki zapisali pieśniu «Nado!» ź Dzim Dzimyčam, Saładucham i Jarmolenkam
Ciapier čytajuć
Jak vyhladaje stylovy dom novaj rektarki Akademii mastactvaŭ koštam paŭmiljona dalaraŭ18
Jak vyhladaje stylovy dom novaj rektarki Akademii mastactvaŭ koštam paŭmiljona dalaraŭ
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary