Aktyvisty sabrali 4000 podpisaŭ za ŭstalavańnie pomnika Kalinoŭskaha ŭ Minsku

9 lipienia skončyłasia kampanija pa zbory podpisaŭ siarod žycharoŭ Minska za budaŭnictva pomnika lidaru nacyjanalna-vyzvolnaha paŭstańnia ŭ 1863—1864 hh. Kastusiu Kalinoŭskamu. Za hetuju spravu ŭzialisia aktyvisty hramadskaj arhanizacyi «Alternatyva».

«Praź niekalki miesiacaŭ pracy ź ludźmi, manitorynhu horada, my pryniali rašeńnie nakont miesca ŭstalavańnia pomnika, — raskazaŭ inicyjatar kampanii Aleh Korban. — Treba razumieć, što siońnia ŭłada nie pojdzie na sastupki i padarunki-to bok nielha pastavić hety pomnik na Kastryčnickaj płoščy ci pobač z administracyjaj. Tamu my sami vyznačyli kropku: skvier, jaki pačynajecca z vulicy Kalinoŭskaha, pobač z praśpiektam Niezaležnaści».

Hety skvier idzie jakraz u bok carkvy Usich Śviatych. U časie budaŭnictva protaijerej Fiodar Poŭny inicyjavaŭ pierajmienavańnie vulicy, dzie mieściłasia budučaja carkva, va Usichśviackuju.

Na siońnia sabrana kala 4000 podpisaŭ. Paŭtysiačy ź ich naležać tym, chto žyvie pobač z samoj carkvoj na vulicy Kalinoŭskaha. To bok peŭnaje žadańnie z boku hramadstva jość.

Pobač ź miescam, jakoje abrała «Alternatyva», znachodziacca Uschodnija mohiłki, dzie pachavanyja dziejačy biełaruskaj kultury: Bykaŭ, Karatkievič, Mulavin. Štohod pobač z parkam tradycyjna prachodzić šeście ŭ Kurapaty. Da taho ž, adznačajuć aktyvisty, što z hetaj kropki ŭ horad traplajuć turysty z Maskvy i pralahaje daroha da aeraportu. Tamu jany ličać abranaje miesca davoli pryjarytetnym.

«Za hety čas da kampanii było ŭ cełym pazityŭnaje staŭleńnie, — praciahvaje Korban. — Svaje podpisy pakinuli mnohija hramadskija i palityčnyja aktyvisty. Taksama ideju padtrymali muzyki, u tym liku Alaksandr Pamidoraŭ i Źmicier Vajciuškievič.

Aproč taho, my źviartalisia da niekatorych asobaŭ z praŭładnych arhanizacyj z prośbaj padtrymać inicyjatyvu podpisam albo zajavaj. Ale, jak pakazała praktyka, da aktyŭnych dziejańniaŭ jany nie byli hatovyja».

Prynamsi, spadar Čarhiniec na słovach padtrymaŭ inicyjatyvu, jon za toje, kab pomnik adnamu z asnoŭnych dziejačaŭ nacyjanalna-vyzvalenčaha paŭstańnia byŭ u Minsku. Ale podpis svoj pastavić nie śpiašajecca.

Takaja ž reakcyja była i ŭ Paŭła Jakuboviča, hałoŭnaha redaktara haziety «Sovietskaja Biełoruśsija», i ŭ kiraŭnictva CK BRSM, apošnija ŭvohule hetuju prapanovu razhladajuć pa siońniašni dzień. Usie jany na słovach nie suprać pomnikaŭ, ale da publičnych vykazvańniaŭ pakul nie hatovyja.

Padčas abchodu kvateraŭ i zboru podpisaŭ na vulicy my zaŭvažyli, što ludzi da akyvistaŭ staviacca pieravažna stanoŭča. Bolšaść viedajuć, chto taki Kalinoŭski, razumiejuć važnaść padziej, jakija adbyvalisia na našaj ziamli.

Učora aktyvisty zapakavali sabranyja podpisy, padpisali zvarot i dasłali listy da kiraŭnika Minskaha harsavieta deputataŭ, da ministra kultury, da staršyni Mihnarvykankama.

«Ciapier my chočam dabicca ad ułady, pa-pieršaje, pryznańnia, što taki pomnik u stalicy musić być, — kaža Aleh Korban. — Pa-druhoje, kab byŭ abvieščany konkurs na lepšy prajekt pomnika. Ja dumaju, heta mahło b adbycca pry padtrymcy łandšaftnaj kamisii pry harvykankamie. Možna dałučyć i našych viadomych biełaruskich skulptaraŭ.

U pačatku 90-ch byli peŭnyja prajekty pomnikaŭ, jany davoli cikavyja, možna sprabavać vykarystoŭvać i ich.

Aktyvisty płanujuć ustalavać pomnik ciaham 2014 hoda. «U hetym usio roŭna ŭžo nie paśpiejem, a nastupny hod jakraz jubilejny».

Aktyvisty płanujuć, što pomnik budzie stvorany i ŭładkavany za košt dziaržavy. Ale nie vyklučajuć, što moža paŭstać pytańnie niedachopu hrošaj. U takim vypadku «Alternatyva» pry dapamozie inšych arhanizacyj hatovaja zładzić zbor narodnych srodkaŭ. Tady heta budzie nasamreč narodny pomnik, jaki pabudujuć ludzi.

• 0
• 0
• 0
• 0
• 0
• 0
• 0
• 0