Biznesmien, asudžany za machlarstva ŭ Minsku, adkryŭ škołu ŭ Varšavie. U peŭny momant baćki zabili tryvohu

American Elite School (pryvatnaja škoła № 99) była vyklučanaja z rejestra škoł 31 žniŭnia 2025 hoda, za dzień da pačatku navučalnaha hoda. Zhodna sa spravazdačaj kuratoryuma adukacyi, da jakoj atrymała dostup Gazeta Wyborcza, pravierki ŭstanovy pakazali, što škoła nie vykonvaje piać asnoŭnych umoŭ. Siarod inšaha, jana nie realizuje navučalnych prahram, jakija b uličvali asnoŭnuju prahramu ahulnaj adukacyi Polščy.

Amal nichto ŭ škole nie havoryć pa-polsku — ni vučni, ni nastaŭniki. Zamiest hetaha škoła realizuje oksfardskuju prahramu, a vučni karystajucca vyklučna brytanskimi padručnikami. Dakumientacyja chodu navučańnia adsutničaje.

Upieršyniu čynoŭniki pryjšli ŭ škołu ŭ studzieni 2024 hoda. Paśla pravierak siamiora z 12 nastaŭnikaŭ byli nakiravanyja na paśladypłomnyja piedahahičnyja kursy, jakija doŭžacca try siemiestry, adnak na praciahu hoda dyrekcyja nie padała va ŭpraŭleńnie adukacyi infarmacyju pra toje, na jakim etapie navučańnia jany znachodziacca. Pavodle źviestak kantraloraŭ, adzin z nastaŭnikaŭ, jaki vioŭ zaniatki pa matematycy, infarmatycy i vyjaŭlenčym mastactvie, nie mieŭ nijakaj piedahahičnaj padrychtoŭki.

Vydali listy ź piačatkami

U American Elite School navučajecca bolš za sto dziaciej — z nulavoha pa vośmy kłasy. Nieviadoma, budzie im zaličany biahučy navučalny hod, ci im pryjdziecca prachodzić navučańnie paŭtorna. Usie vučni — pryjezdžyja, u asnoŭnym z Ukrainy i Indyi, čaściej za ŭsio heta dzieci supracoŭnikaŭ polskich filijałaŭ zamiežnych karparacyj. Płata za navučańnie składaje, u zaležnaści ad uzrostu dziciaci, ad 42,2 tysiačy da 56,2 tysiačy złotych (prykładna ad 10,5 da 14 tysiač dalaraŭ na hod).

Pra toje, što škoła vyklučanaja z rejestra, baćki nie viedali. Jany zabili tryvohu, kali z ZUS im pačali prychodzić listy z patrabavańniem viarnuć vypłačanuju dziaržaŭnuju dapamohu 800+. Reč u tym, što zamiežniki mohuć atrymlivać jaje tolki tady, kali ich dzieci školnaha ŭzrostu achoplenyja polskaj sistemaj adukacyi. Pravierka ŭ sistemie infarmacyi ab adukacyi (SIO) pakazała, što jany tam nie adlustroŭvajucca.

Škoła adkazała zaniepakojenym baćkam, što va ŭpraŭleńni adukacyi adbyłasia pamyłka, jakaja na praciahu niekalkich tydniaŭ budzie vypraŭlenaja, i što American Elite School nie atrymlivała paviedamleńniaŭ adnosna svajho statusu, a pra vyklučeńnie z rejestra daviedałasia tolki ŭ siaredzinie studzienia 2026 hoda. Tym časam, pavodle źviestak Gazeta Wyborcza, dyrektar škoły znachodziŭsia ŭ pastajannym kantakcie z upraŭleńniem adukacyi.

Baćkam škoła nakiravała listy ź piačatkami, jakija paćviardžajuć, što dzieci naviedvajuć ustanovu adukacyi. Heta pavinna być dokazam taho, što im naležyć dapamoha 800+.

U kastryčniku 2025 hoda, užo paśla vyklučeńnia škoły z rejestra, baćki atrymali inšy dakumient — dadatak da damoŭ, u jakim dyrekcyja paznačaje novyja numary rachunkaŭ dla apłaty navučańnia. Pavodle infarmacyi Gazeta Wyborcza, heta pryvatnyja rachunki, ich niama ŭ aficyjnym pieraliku subjektaŭ, zarehistravanych jak płacielščyki PDV, jaki viadziecca Minfinam. Pad dakumientami stajać podpisy Illi Vołacha/Słakatoviča abo jaho pravaj ruki Alaksandry Katušonak.

Sprava «Hrušaŭskaha pasada» i kanflikt u Varšavie

Illa Vołach u Biełarusi budavaŭ žyły kompleks «Hrušaŭski pasad» u Minsku, ale skončyŭ budaŭnictva tolki napałovu. Jak vyśvietliła śledstva, u 2016—2020 hadach biznesmien pryciahnuŭ 58 miljonaŭ rubloŭ u budaŭnictva kompleksu, ale vydatkavaŭ 24 miljony ź ich na inšyja patreby, u tym liku na kuplu asabistaj nieruchomaści, darahich aŭtamabilaŭ i pradmietaŭ raskošy.

Vołacha abvinavacili ŭ naŭmysnym bankructvie i złoŭžyvańni słužbovym stanoviščam. Ad jaho dziejańniaŭ paciarpieli 430 čałaviek. U 2024 hodzie Vołacha asudzili na 10 hadoŭ kałonii. Sud byŭ zavočnym, bo biznesmien da taho času źjechaŭ u Polšču i atrymaŭ polskaje hramadzianstva. Jon pamianiaŭ proźvišča na Słakatovič.

Biełaruś abviaściła Illu Vołacha ŭ vyšuk pa «čyrvonaj nocie» Interpoła. Biznesoŭca dapytvali ŭ akruhovaj prakuratury Varšavy, adnak Polšča nie vydała jaho praz aściarohi, źviazanyja z parušeńniami pravoŭ čałavieka ŭ Biełarusi. Da taho ž kanstytucyja Polščy zabaraniaje vydavać svaich hramadzian inšym dziaržavam.

Uletku 2025 hoda imia Vołacha ŭspłyło ŭ polskaj presie ŭ suviazi ź inšym kanfliktam. Supracoŭniki restarana, jaki Słakatovič adkryŭ u varšaŭskim rajonie Vilanaŭ i jaki paśla zakryŭsia, damahalisia ad biźniesmena vypłaty zarobku.

Što budzie sa škołaj

Choć škoła abviaściła pra nabor na budučy hod, čynoŭniki ad adukacyi zajaŭlajuć, što jana zakrytaja. Horad abiacaje znajści miescy ŭ dziaržaŭnych škołach usim vučniam, jakija zachočuć naviedvać varšaŭskija ŭstanovy.

Kiraŭnictva škoły abskardziła rašeńnie kuratoryuma adukacyi ŭ Vajavodskim administracyjnym sudzie ŭ Varšavie. Adnak pavodle zakona padačy skarhi ŭ sud nie prypyniaje vykanańnia vyniesienaha rašeńnia. Na paviedamleńnie haziety Gazeta Wyborcza Słakatovič nie adkazaŭ.

• 1
• 0
• 0
• 8
• 0
• 0
• 3
• 0