Rabočy MAZa źniaŭ videa pra žyćcio liciejki. Ciapier jaho pałochajuć kryminalnaj spravaj za paklop

Biełaruski internet aburyli niezvyčajnyja videasiužety pra žyćcio liciejnaha cecha Minskaha aŭtamabilnaha zavoda. Try roliki pad ahulnaj nazvaj «Chroniki zavoda» ab surovaj pracy na adnym z najbujniejšych pramysłovych pradpryjemstvaŭ Biełarusi źniaŭ viasnoj 2012 hoda adzin z rabočych cecha Rusłan Mirzojeŭ.

Na kadrach małady čałaviek zachavaŭ usio toje, što bačać kožny dzień u liciejnym cechu MAZa surovyja biełaruskija mužčyny: prostyja pracoŭnyja bytoŭki, nieabsiažnuju terytoryju zavoda abo žachlivuju moc vahranačnaj piečy dla płaŭki mietału.

Zrešty, žyćcio liciejnaha cecha dla Rusłana Mirzojeva ŭžo ŭ minułym. Paśla taho, jak rabočy vykłaŭ svaje try roliki ŭ internet, paśledavała i chutkaja reakcyja kiraŭnictva, jakoje zapatrabavała vydalić videa, što i było ŭ vyniku zroblena. Ciapier Rusłan pracuje ŭ inšym cechu MAZa, ale na dniach vyrašyŭ «pamianuć» staroje i znoŭ apublikavaŭ svaje siužety.

Praŭda, kiraŭnictva i hetym razam chutka zreahavała na skandalnyja roliki. 11 lipienia ŭ Rusłana znoŭ adbyłasia razmova z načalstvam.

«Siońnia mianie znoŭ vyklikali ŭ Słužbu biaśpieki, i ja čarhovy raz vydaliŭ heta videa ź internetu.

Zdymaŭ heta videa ŭ krasaviku 2012 hoda, a potym vykłaŭ jaho ŭ internet. Ale praź niekatory čas pajšło šmat šumichi z hetaj nahody. U toj čas ja praciahvaŭ pracavać u liciejnym cechu. I mianie paprasili (kiraŭnictva zavoda), kab ja vydaliŭ ich ź internetu. Minułym razam videa „pravisieła“ tam pryblizna tydzień, pakul infarmacyja pra heta nie dajšła da kiraŭnictva zavoda MAZ».

«Prasili vydalić videa, bo heta moža abiacać vialikija prablemy z zakonam. Nibyta heta videa z paklopam, i ludzi, jakija tam ŭdzielničali, mohuć napisać na mianie zajavu usio heta moža abiarnucca mnie kryminalnym pakarańniem.

Naohuł niejkich palityčnych matyvaŭ, kali zdymaŭ videa, ja nie nasiŭ. Prosta kožny dzień na pracy ja sutykaŭsia sa śmiešnymi momantami. Dy i naohuł ja muzyčny čałaviek, zajmajusia tvorčaściu. Voś i vyrašyŭ dla raznastajnaści vykinuć u internet pryšpilnyja momanty sa svajho miesca pracy.

Naohuł u adnym ź videa, intervju z zavadčanami ja na ich pytańnie „dzie heta budzie?“ adkazvaŭ, što heta budzie ŭ internecie i „vy ŭsio budziecie papularnymi“. Nichto ničoha suprać nie skazaŭ,

a naadvarot navat prasili źniać i pakazać, jak jany pracujuć i ŭ jakich umovach».

«Karystalniki pačali pisać typu „žeść“, „ia nie dumaŭ, što ty pracuješ u takich umovach“. Dla niekatorych heta było naohuł šokam.

Rusłan — čałaviek z šmatbakovymi zachapleńniami. Jon zajmajecca boksam, piša muzyku, u asnoŭnym, chip-chop. Hetamu, praŭda, «paspryjaŭ» nie samy lepšy pieryjad u jaho žyćci.

«U mianie raniej byli prablemy z narkotykami i ałkaholem. Ale mnie ŭdałosia spynić heta i pačać zdaravieć. Dva hady ja ŭžo ćviarozy, i staŭ vyznavać duchoŭnyja pryncypy: zdarovy ład žyćcia, imknieńnie da dabryni, niejkich stanoŭčych čałaviečych jakaściaŭ. I staŭ sprabavać vykazać heta ŭ svajoj tvorčaści. To bok „ŭpisvać“ svajo minułaje niehatyŭnaje i paraŭnoŭvać jaho z sapraŭdnym u pieśniach. I kazać pra toje, što kožny zdolny mieć lepšaje žyćcio.

Za svaje minułyja dziejańni ja adbyvaŭ pakarańnie ŭ papraŭčaj ustanovie. Kaliści ja ździejśniŭ chulihanskija dziejańni ŭ adnosinach da čałavieka, a taksama rabavańnie. Za heta i adbyvaŭ pakarańnie. Niadaŭna ja vyzvaliŭsia, času doŭha šukać novuju pracu nie było, i ja pajšoŭ na zavod. Zaraz viadu zvyčajny ład žyćcia: u mianie jość siamja i maleńkaje dzicia. Siam'ja-praca-dom».

• 0
• 0
• 0
• 0
• 0
• 0
• 0
• 0