Niekalki tysiač biełarusaŭ stracili zarobak i padpracoŭku na patrymanych «bumierach»
Pavyšeńnie Rasijaj taryfaŭ utylizacyjnaha zboru padarvała biznes mnohich biełarusaŭ, jakija zajmalisia pierahonam zachodnich užyvanych aŭtamabilaŭ u Rasiju. Asabliva papularnym da śniežnia 2025 hoda byŭ BMW. Pra heta piša ŭ svaim telehram-kanale redaktar «Aŭtastata» Siarhiej Celikaŭ, zaŭvažyła vydańnie «Biełorusy i rynok».
Jak adznačana, maksimalny abjom uvozu lehkavych aŭtamabilaŭ z prabieham praź Biełaruś prypaŭ na 2023—2024 hady. Tady abjomy impartu składali 45,4 i 45,9 tysiačy adpaviedna. A voś u 2025 hodzie abjomy ŭvozu abvalilisia bolš čym udvaja (-58%) da 19,1 tysiačy štuk.
Napiaredadni źmieny taryfaŭ utylzboru (z 1 śniežnia 2025 hoda) byŭ zafiksavany miesiačny ŭsplosk (4079 štuk), piša ekśpiert. Dalej, u śniežni, impart skaraciŭsia amal u 4 razy (da 1088 štuk), a ŭ studzieni ź Biełarusi na rasijski rynak trapiła ŭsiaho 613 aŭto z prabieham.
Taksama Siarhiej Celikaŭ źviarnuŭ uvahu na toje, što kardynalna źmianiłasia struktura ŭvozu aŭtamabilaŭ. Da 1 śniežnia na aŭto mahutnaściu zvyš 160 konskich siłaŭ prypadała amal dźvie traciny impartu (63,1%), a paśla 1 śniežnia — tolki krychu bolš za čverć (26,2%).
Da ŭviadzieńnia płanki ilhotnaha ŭtylizacyjnaha zboru kožny piaty ŭžyvany aŭtamabil, uviezieny praź Biełaruś, byŭ marki BMW (20,4%). Na druhim miescy sa značnym adstavańniem išli Volkswagen (7,4%) i Chevrolet (7%). Tam ža niedaloka byli Mercedes-Benz (6,8%) i Audi (6,7%).
A paśla 1 śniežnia dola bavarskaha kancerna skaraciłasia ŭdvaja (11,3%). U lidary vyjšaŭ Volkswagen (12,1%), na treciuju pazicyju niečakana padniaŭsia Peugeot (9,4%). Pry hetym Mercedes-Benz utrymaŭsia na 4‑j pazicyi (7,2%), a Audi navat nie trapiła ŭ dziasiatku.
Kamientary