Rasija raspačała suprać Ukrainy ekanamičnuju vajnu

Fiederacyja pracadaŭcaŭ Ukrainy (FPU) źviarnułasia da prem'jer-ministra krainy Mikałaja Azarava z prośbaj jak maha chutčej dapamahčy rašeńniu na mižuradavym uzroŭni prablem, jakija pačali ŭźnikać va ŭkrainskich pradpryjemstvaŭ-eksparcioraŭ na rasijskaj mytni.

Pavodle infarmacyi FPU, z 14 žniŭnia Fiederalnaja mytnaja słužby Rasijskaj Fiederacyi całkam prypyniła impart z Ukrainy na nieakreśleny čas.

Heta vyjaŭlajecca ŭ tym, što transpartnyja srodki, jakija pieravoziać pradukcyju ŭkrainskich tavaravytvorcaŭ, na miažy Rasii padlahajuć biespadstaŭnaj tatalnaj praviercy, uklučajučy vyhruzku, pieraŭzvažvańnie hruzu i novuju zahruzk», — havorycca ŭ paviedamleńni.

«U Fiederacyi pracadaŭcaŭ Ukrainy adznačajuć, što ŭsio heta pryvodzić da pavieličeńnia terminaŭ prastoju vahonaŭ dy inšych transpartnych srodkaŭ, i jak vynik, viadzie da padaražeńnia abo zryvu pastaŭki tavaraŭ, psavańnia pradukcyi, a taksama padryvaje pazicyi ŭkrainskich tavaravytvorcaŭ na rynku Rasii», — zajavili ŭ Fiederacyi pracadaŭcaŭ.

«Pavodle infarmacyi arhanizacyi, z 00:00 hadzin 14 žniŭnia da profilu ryzyki sistemy kiravańnia ryzykami Fiederalnaj mytnaj słužby Rasii, u dadatak da pieršych čatyroch dziasiatkaŭ pradpryjemstvaŭ, jakija trapili tudy ŭ lipieni hetaha hoda, byli dadadzieny ŭsie biez vyklučeńnia ŭkrainskija eksparciory», — havorycca ŭ paviedamleńni.

Faktyčna, heta nieabvieščanaja handlovaja vajna. Takija dziejańni parušajuć praviły Suśvietnaj handlovaj arhanizacyi, kudy Rasija niadaŭna ŭstupiła.

I Partyja rehijonaŭ, i ŭkrainskaja apazicyja vystupili z rezkim asudžeńniem dziejańniaŭ Rasii.

Niadaŭna, jak paviedamlałasia, Rasija zabaraniła pastaŭki ŭkrainskich cukierak i šakaładu. Adnačasova sa słodyčami Maskva pastaviła barjery na šlachu impartu ŭkrainskich trub. Na dumku naziralnikaŭ, ciapier Maskva choča sarvać padpisańnie damovy pra asacyjacyju miž Ukrainaj i Jeŭrasajuzam.

Pytańnie, ci dałučycca Biełaruś da Kramla ŭ cisku na Ukrainu, maje istotnaje palityčnaje značeńnie.

Biełaruś pakul nie zabaraniła ŭkrainskija cukierki śledam za Rasijaj.

Rasija skarystoŭvaje toj momant, što Jeŭrasajuz ciapier pahłynuty baraćboj z ekanamičnym kryzisam, a ŭkrainski prezident Janukovič niepapularny, u spadziavańni sarvać jeŭraintehracyju Ukrainy. U svoj čas na samicie Rasija — NATO prezident Pucin pahražaŭ, što ŭ vypadku pačatku pracedury ŭstupleńnia Ukrainy ŭ hetuju arhanizacyju «adbudziecca raskoł Ukrainy». Zachodnija palityki interpretavali heta jak pahrozu Rasii pačać pracu, skiravanuju na raskoł Ukrainy. Pytańnie pryjomu Kijeva ŭ Paŭnočnaatłantyčny aljans tady było adkładziena ŭ doŭhuju skryniu. Niečaha padobnaha Maskva choča dabicca i ciapier, tolki ŭžo ŭ adnosinach da ES.

Rasija pravodziła palityku ekanamičnaha cisku na Ukrainu ad pačatku 90-ch. Skažam, ceny na naftu i haz dla Biełarusi našmat nižejšyja, čym dla našych paŭdniovych susiedziaŭ, a farmalnyja i niefarmalnyja abmiežavańni na handal našmat bolšyja. U vyniku hetaha na siońnia Biełaruś pa pamiery VUP na dušu nasielnictva apiaredžvaje Ukrainu amal udvaja, choć 20 hadoŭ tamu krainy znachodzilisia na adnym uzroŭni raźvićcia. Adnak dałučeńnie Ukrainy da ES zdolnaje źmianić hetuju tendencyju.

Možna čakać, što novy, adkryty ekanamičny šantaž Kijeva Maskvoj moža vyklikać rezkuju reakcyju ZŠA i Jeŭrasajuza.

• 0
• 0
• 0
• 0
• 0
• 0
• 0
• 0